Reynsluakstur: Ssangyong Rexton HLX, árgerð 2019
Umboð: Bílabúð Benna

Vel búinn alvöru jeppi sem er sérlega hljóðlátur og mjúkur í akstri

Það var engu líkara en að veðurguðirnir hefðu ákveðið að ganga í lið með mér og aðstoða við reynsluaksturinn á hinum nýja Ssangyong Rexton, því um leið og ég tók við lyklunum byrjaði að snjóa og það var full þörf á fjórhjóladrifinu í nýföllnum snjónum.

image

SsangYong Rexton 2019 er stórt skref með tilliti til útlits, hönnun, hagkvæmni og þæginda - þetta er einfaldlega stór framför í fyrri kynslóð Rexton.

Komnir á nýjan stað í jeppaheiminum

Eitt er ljós að með þessum nýja Rexton eru þeir hjá Saangyong komnir á alveg nýjan stað í jeppaheiminum. Fyrirtækið býr að langri reynslu á þessu sviði, eða allt frá 1954, en fóru á fulla ferð 1987 þegar þeir tóku upp heitið Ssangyong Motor. Þá hófst samstarf við Mercedes Benz, og Musso kom fram í dagsljósið, jeppi sem náði góðri fótfestu hér á landi og hefur enn. Ýmsar eignabreytingar hafa síðan átt sér stað í áranna rás.

image

Hæð undir lægsta punkt er 224 mm sem setur Rexton í flokk með mörgum þeirra alvöru jeppa sem eru á markaði.

Flott útlit

Góðu fréttirnar eru að allt frá framenda að afturenda er Rexton með gott útlit, áberandi stílhreinn grill, sléttur prófíll, með sléttum línum allt að snyrtilegum afturendanum. Heildaryfirbragð bílsins er allt frekar almennt á að horfa en það er einmitt það sem margir kaupendur jeppa elska.

image

Að aftan hefur hönnuðum Rexton tekist að gefa jeppanum sitt eigið yfirbragð.

Flott innanrými

Innanrýmið í Rexton er þægilegt og um leið glæsilegt. Það er með hreinar línur, gott skipulag á hlutum og í HLX-gerðinni er bíllinn búinn demant-saumuðu nappa leðuráklæði, klæðningar með viðaráferð til skiptis við svarta fleti og króm. Í heild er yfirbragð innanrýmisins bara flott.

image

Stórar hurðir sem opnast vel gefa gott aðgengi að bílnum. Aðgengi að þriðju sætaröðinni er einnig einfalt: sæti í miðjubekknum er velt fram með tveimur handtökum og .á er auðvelt að stíga inn. Það er svo annað mál að plássið þar er ekki mikið.

Í framsætum fá ökumaður og farþegi sæti með góðum stuðningi, rafstýrð á alla vegu og með mjög góðum sætishita sem hægt er að stilla í þrjú stig hitunar. Stór 9,2 tommu snertiskjár með góðu íslensku leiðsögukerfi og sem býður upp á skipulagt útsýni yfir nærliggjandi svæði þegar þú notar 360 gráðu myndavélina. Að sjálfsögðu býður skjárinn upp á tengingar við Apple Car Play og Google Android.

Geymslupláss bjóða upp á tvöfaldur bolla/flöskuhöldur og hólf fyrir lykla, síma o.s.frv. á milli ökumanns og farþega, auk hurðavasa, vasa aftan á sætum og bollahöldur fyrir farþegar í annarri sætaröð auk lítilla hólfa fyrir farþegana í þriðju sætaröðinni.

image

Farangursrýmið í Rexton er dágott eða frá 680/820 lítrum upp í 1806 lítra þegar búið er að leggja öll aftursæti niður. Á fyrstu myndinni eru bæði sætin í aftasta bekknum niðri, á mynd tvö er búið að reisa upp annað sætið í aftasta bekknum og á þeirri þriðju er bæði sætin komin upp, en þó er eftir smápláss fyrir farangur eða innkaupin í búðinni.

Gott pláss á annarri sætaröð en minna í þeirri þriðju

Önnur sætaröðin er með skipt sæti, 60/40 skiptin með innfelldum armpúða í miðju, býður upp á gott pláss fyrir farþega; Þegar setið er beint fyrir aftan ökumanninn með það sæti í eðlilegri akstursstöðu er bnægt fótarými fyrir þann sem situr í sætinu fyrir aftan.

Rúmgott farangursrými

Farangursrýmið í Rexton er gott. Þar sem bíllinn er með þrjár sætaraðir þá er búið að lyfta botni farangursrýmisins aðeins, en samt er plássið 680 lítrar. Hægt er að stækka rýmið 820 lítra með því að taka þessa botnplötu í burtu. Þó að það sé aðeins lítið pláss fyrir farangur þegar öll sjö sæti eru í notkun, en ef aftasta röðin og röðin í miðju eru lagðar niður eykst farmrýmið í 1806 lítra.

image

Mælaborð og umhverfi í framsætum er til fyrirmyndar. Stór skjárinn er með íslensku leiðsögukerfi og býður einnig upp á ýmsar tengingar. Fyrir framan skiptistöng sjálfskiptingarinnar eru tengi fyrir USB og eins 12V-tengi fyrir aukabúnað.

Sérlega hljóðlátur og mjúkur í akstri

Eitt sem kemur  skemmtilega á óvart er hve gaman að aka Rexton. Með í huga að þetta er frekar stór jeppi, smíðaður á grind þá mætti búast við því að hann væri með hefðbundnar „jeppahreyfingar“ í akstrinum

image

Sjö þrepa sjálfskiptingin kemur frá Benz og hentar þessum bíl vel. Hinsvegar fannst mér stundu stirt að færa stöngina á milli staðsetninga, væntanlega minn klaufaskapur, því þetta þykir mjög vel heppnuð lausn frá Benz. Næst fyrir aftan skiptistöngina er kringlóttur hnappur sem skiptið léttilega á milli drifs á afturhjólum, á öllum fjórum hjólum og loks í lága drifið.

Gott afl og ágætt viðbragð

Með eigin þyngd sem nemur 2130 kg mætti vænta þess að þetta sé bíll sem er ekki að vinna neina spyrnukeppni – það tekur þennan stóra sjö sæta jeppa smá stund að ná fullri siglingu, en viðbragðið er samt mjög gott og án átaka!

Annars virðist 2,2 lítra dísilvélin og sjö þrepa sjálfskiptingin sem á ættir að rekja til Benz, vera flott samstæða með nóg af snúningsvægi til staðar. Stýrið í Rexton er frekar létt og nákvæmt og heldur því vel á meiri hraða.

Sú staðreynd að Rexton er alvöru jeppi byggður á grind hefði fyrir fram getað gefið þá niðurstöðu að allar hreyfingar gætu verið klunnalegri – en útkoman kom á óvart, þægindin í akstrinum eru eins og í góðum fólksbíl af stærri gerðinni.

Góður á grófara vegyfirborði

Þrátt fyrir að fyrri kynslóðir Ssangyong hafi ekki unnið fegurðarverðlaun þá hafa ökutæki þeirra í áranna rás fengið gríðarlega viðurkenningu, ef ekki virðingu, fyrir hæfileika sína á sviði fjórhjóladrifsins.

Til að skipta á milli 2WD, 4WD High og 4WD Low, er notuð lítill hringlaga hnappur á miðjustokknum beint fyrir aftan gírskiptinguna. Rexton verður að vera kyrrstæður og í hlutlausum gír til að skipta á milli 4WD High og 4WD Low. Vegna þess að ekið var til skiptis á auðu malbiki og snjó þessa daga þá var nokkuð oft skipt á milli drifa og virkaði mjög vel – og var þægilegt

image

Það er nóg at tökkum og rofum fyrir ökumanninn til að spila á. Á hurðarspjaldinu vinstra megin fyrir neðan gluggann eru stillingar þar sem hægt er að stilla inn í minni hvernig sætið er stillt fyrir nokkra ökumenn. Í stýrinu eru hnappar fyrir síma og útvarp, til að svara og hækka eða lækka, takkar fyrir upplýsingatölvu og fleira. Stjórnbúnaður miðstöðvar er fyrir neðan skjáinn og þar fyrir neðan eru hnappar fyrir stillingar á hitun sæta í þremur styrkleikum.

Stöðugleiki Rexton virðist góður í akstri, lægsti punktur frá jörð er 224 mm, svipuð og hjá mörgum keppinautunum, en aksturstilfinningin er samt sú að við séum samt nær vegyfirborðinu.

Mikill búnaður

Þegar röðin kemur að búnaði þá er þessi bíll svo hlaðinn búnaði að það tæki langan tíma að telja það allt upp. Bíllinn er með

image

Vélin í Rexton er 2,2 lítra og 181 hestafl. Snúningsvægið er 420 Nm við 1600 til 2600 snúninga sem skila bílnum vel áfram og tryggir að ökumaðurinn hefur ávallt tilfinningu fyrir því að nægt afl sé til staðar til dæmis þegar lagt er upp í brekku.

Þá er enn einn búnaður sem ég vil nefna, en það eru frábær „aðgönguljós“. Gamli jeppinn minn sem nálgast tvítugsaldur lætur ökuljósin loga í smástund þegar heim er komið til að auðvelda það að ganga frá bílnum og inn. Rexton (líkt og sumir aðrir bílar) gerir gott betur, því um leið og komið er út úr húsi og ýtt er á fjarstýringuna í lyklinum þá kvikna ljós, bæði að framan, ljós sem lýsa niður úr hliðarspeglunum til að auðvelda það að ganga með fram bílnum og loks kviknar ljós í hurðarhandfanginu sjálfu. Annars eru hliðarspeglarnir kapítuli út af fyrir sig. Húsið utan um þá lítur út eins og ArtDeco-ljós frá miðri síðustu öld, en útlitið má réttlæta með þessum góðu aðgönguljósum

image

Inngönguljósin á Rexton er mjög góð og veita ökumanni og farþegum öryggi þegar komið er að bílnum í myrkri.

Niðurstaða

Það er ökutæki sem er hlaðið búnaði, meiri búnaði en hægt er að telja upp og ég hef það á tilfinningunni að það vanti nánast ekki neitt. Bíllinn er með flottar innréttingar og er eins og hugur manns í akstri.

image

Ssangyong Rexton HLX sameinar vel kosti jeppa og lúxusfólksbíls – svo vel fer hann með ökumann og farþega í venjulegum akstri

Á einhverjum tímapunkti hvarflaði að mér að bera þennan nýja Rexton við bíla eins og Jeep Grand Cherokee eða Toyota Land Cruiser – en ýtti þeim hugsunum jafnhraðan frá mér – fannst það einfaldlega ekki passa!

Hljóðlátur

Mikill staðalbúnaður

Góður frágangur á innréttingu

Þröngt um farþega í þriðju sætaröð

Ssangyong Rexton verðlisti
Útfærsla
Drif
Vél
Girkassi
Eldsneyti
Tog-Hö.
VERÐ FRÁ.
Premium
Fjórhjóladrif2.2L Sjálfskipting. 8 gíra Dísel441 - 202
Adventure
Fjórhjóladrif2.2L Sjálfskipting. 8 gíra Dísel441 - 202
Ultimate
Fjórhjóladrif2.2L Sjálfskipting. 8 gíra Dísel441 - 202
* Eydsla bL akstur ** 0-100 km/klst
Gert með fyrirvara um prentvillur. Bílabúð Benna áskilur sér rétt til breytinga án fyrirvara á verði og búnaði. Vinsamlegast athugið að búnaður á mynd getur verið ólíkur búnaði bílsins.
Við reynsluökum bílum, tökum viðtöl, skrifum greinar og fjöllum um bíla á óhlutdrægan hátt. Umferð, öryggi, vegir, tryggingamál og allt annað sem tengist bílum og umferð. www.bilablogg.is