Bíll sem markar tímamót í samkeppninni

Það er óhætt að segja að þessi bíll hafi vakið mikla eftirvæntingu þegar tilkynnt var um komu hans. Það var spáð í drægni, verð, hagkvæmni, þægindi og um fram allt framúrstefnulega hönnun. Já, VW ID.4, litli bróðir VW ID.3 sem kom sá og sigraði fyrir skömmu – er bíll fólksins, á því leikur enginn vafi.

Hvað getur svona bíll?

Stóra spurningin er þessi: Dugar venjulegri fjölskyldu eitt stykki ID.4 til allra hefðbundinna nota – dagleg notkun sem fjölskyldubíll og til lengri og skemmri ferðalaga?  

Raundrægni gæti verið að meðaltali um 350-400 km. en þar spila margir þættir inn í eins og veður, hiti, vegyfirboð og svo að sjálfsögðu hvernig bílnum er ekið.

Reynsluakstursbíllinn var af 1st Edition gerð. Það er sú gerð sem VW setur á markað í sérútgáfu og með blönduðum búnaði áður en hinar hefðbundnari gerðir koma síðan á markað.

Hér má skoða allt um ID.4 hjá söluaðila.

Kraftmikill og hagkvæmur rafmótor

Það er svolítið skrítið þegar maður kíkir undir bílinn – hann er algjörlega sléttur og ekkert sem getur tekið niðri. Rafmótorinn skilar 204 hestöflum og togar um 310 Nm. Krafturinn er því nægur. Hægt er að velja um fjórar mismunandi aksturstillingar en þær eru Eco, Comfort, Sport og síðan er hægt að sérsníða sína eigin.

Er eitthvað vesen að hlaða svona bíl?

Nei, aldeilis ekki. Sagt hefur verið að daglegur aksturs meðal Reykvíkings og nærsveitarmanna séu um 40 kílómetrar á dag. Gefum okkur að við búum í Reykjanesbæ og vinnum í Garðabænum. Þá ökum við um 80 kílómetra fram og til baka, notum bílinn svo eitthvað í hádeginu og sækjum síðan börnin í tómstundir og kíkjum svo í kaffi til Grindavíkur um kvöldið en frá Reykjanesbæ til Grindavíkur er um 24 kílómetrar.

Segjum 70 kílómetrar á venjulegum degi – talsverður akstur, ekki satt?  ID.4 er með 11 kWh hleðslugátt sem fyllir bílinn af rafmagni í heimahleðslustöð á um 7.5 tíma.

Akureyri – hér komum við

Ein algengasta spurning til okkar Bílabloggs hópsins varðandi prófun rafmagnsbíla er sú hvort bíllinn komist til Akureyrar á hleðslunni. Fyrst fannst okkur ekkert skrítið að fólk vildi vita þetta – en núna er öldin önnur. Bílaframleiðendur eru að finna sína fjöl í rafbílaframleiðslu.

Hins vegar hef ég aldrei keyrt norður á Akureyri nema með stoppi. Pulsa, kók, ís í brauðform og svo kannski heitur pottur í leiðinni. Á meðan myndi ég sko hlaða.

Einstaklega fallegur bíll

ID.4 er sérlega vel heppnaður útlitslega séð – og á það við um bæði að innan og utan. Mjúkar línur, nýtískuleg samsetning, LED ljós að framan og aftan mynda samfellu og bíllinn er rammaður inn með flottum gerðum af stórum og miklum felgum. 1st Edition bíllinn kemur á 20 tommu Drammen felgum en 1st Edtion Max kemur á 21 tommu Narvik felgum – sérlega flottum.  

Hægt er að velja um tvær gerðir rafhlaða, aðra 52 kWh og þá stærri 77 kWh. Í framhaldinu koma svo fleiri gerðir – allt frá City og Style með minni rafhlöðunni og Life, Business, Family, Tech og Max – sem allt eru gerðir með mismunandi búnaði, allt eftir því hvernig þú vilt hafa bílinn. Hér má sjá frekari búnaðarlýsingu og verð.

Frábærir aksturseiginleikar

VW ID.4 er sérlega skemmtilegur í akstri. Bíllinn lætur vel að stjórn, léttur og nákvæmur í stýri og fjöðrunin svíkur ekki. Það er mjög sérstök tilfinning að aka þessum bíl yfir hraðahindrun því hreyfingar bílsins eru talsvert ólíkar öðrum bílum sem við höfum reynsluekið.

Hann einhvernveginn svífur yfir án þess að maður finni fyrir því en samt er bíllinn með frekar stinna fjöðurn – án þess að hún sé of mjúk.

Týpa 2 hleðslugátt

ID.4 getur drukkið í sig allt að 125 kWh í hraðhleðslu og tekur þá um 40 mínútur að hlaða upp í 80%. Í heimahleðslu tekur hann við 11 kWh á klukkustund og býður Hekla upp á hleðslustöðvar sem henta.

Einfalt mál að segja bless við bensínið

Nú, á fyrsta ársfjórðungi ársins 2021 er rafbílatjúttið að hefjast. Með þessum glæsilega valkosti sem VW býður nú upp á, er brotið blað í rafbílasögunni – hér er kominn afar rúmgóður bíll sem hentar mörgum, á góðu verði og fallegur.

Helstu tölur:

Verð frá 5.090 þús. (Reynsluakstursbíll kr. 6.490 þús).

Rafhlaða: 52-77 kWh.

Drægni: -340-500 km. skv. WLTP.

Hestöfl: 204.

0-100 km á klst. 8,5 sek.

Hámarkshraði: 160 km/klst.

CO2: 0 g/km.

L/B/H: 4584/1852/1631

Veghæð: 164mm.

Eigin þyngd: 2.124 kg.

Hleðslutími AC 7,5 klst.

Hleðslutími DC (30-80%) 40 mín.

Dráttargeta: 1000 kg.