Nýr Corolla Cross, sprækur sportjepplingur

Það er alltaf einhver sjarmur yfir Toyota finnst mér. Hins vegar hefur mér fundist Toyota sem fyrirtæki haga sér einkennilega í ljós þróunar sem á sér stað í rafbílageiranum.

Klúður ofan á klúður varðandi útkomu hins fyrsta 100% rafbíls Toyota hefur komið þeim aðeins niður á kortinu finnst mér.

Fallegur bíll með nægu afli

Þessi Toyota Corolla er samt sem áður að skora hátt hjá okkur. Fallegur bíll með nægu afli án þess að CVT skiptingin ætli að æra mann.

Það vekur líka athygli að plássið fyrir stóran ökumann er nægt, loksins í Toyota Corolla. Það hefur verið full lítið pláss fyrir langa leggi í framsætum Corollal síðustu ár.

Sætin þægileg

Sætin eru þægileg og eru í ætt við það sem Toyota er með í öðrum gerðum. Seturnar svolítið stuttar en það er svo sem ekkert nýtt heldur.

Hins vegar er hliðarstuðningur betri og setan passar undir venjulegan rass þannig að maður situr ekki upp á köntunum sem eiga að halda við þann líkamshluta.

Reynsluakstursbíllinn var rauður með sanseringu í lakkinnu, felgurnar koma mjög vel út gefa bílnum flott útlit og þær fylla vel út í hjólaskálarnar.

Nýtt og öflugra tvinnkerfi

Toyota Corolla Cross er búin fimmtu kynslóðar tvinnkerfi Toyota sem búið er nýjum, aflmeiri og hljóðlátari rafmótorum.

Ekkert gefnir fyrir nýjungar

Mælaborðið í þessum bíl hefur ekki fengið neina sérstaka yfirhalningu frá fyrri gerðum nema að stór og stæðilegur margmiðlunarskjárinn stendur hátt uppúr borðinu.

Hins vegar getur þú tengt Android Auto og Apple Carplay og þannig verið í þínu vanalega umhverfi í gegnum snjallsímann þinn. Kannski er það bara nóg, spurning hvort bílaiðnaðurinn þarf sjálfur að skaffa öpp þegar flestir tengja orðið síma sína við bílinn.

Eyðir svipað og bíll án rafmótors

Mælaborðið er stafrænt og sýnir það helsta sem manni langar að sjá í akstri, svo sem eyðslutölur og afköst. Þetta með eyðslutölurnar kom talsvert á óvart því við ókum bílnum mest í langkeyrslu.

Það er kannski ekkert mikil eldsneytiseyðsla fyrir þetta öflugan bíl og fjórhjóladrifinn líka. En samt hærra en framleiðandinn gefur upp við svipaðar aðstæður.

Fullt af öryggisbúnaði

Toyotan er vel búin öryggisbúnaði. Til dæmis er hliðarútstigsvörn sem koma á í veg fyrir slys þegar gengið er um hurðir bílsins.

Farangursgeymslan er bara nokkuð þokkaleg, á reynsluakstursbílnum er rafdrifinn opnun á afturhlera og geymslurýmið er um 433 lítrar. Fínt pláss.

Hannaður til að henta mörgum

Þessi bíll hentar án efa talsvert stórum markhópi. Flottur fjölskyldubíll fyrir vísitölufjölskyldu og frábær kostur fyrir fólk sem vill vera á fjórhjóladrifnum fólksbíl til að komast um borg og bæ á þægilegan máta.

Vel heppnaður Corolla Cross

Já, Toyota Corolla Cross er bara ansi skemmtilegur bíll. Það er gaman að aka bílnum, hann er kraftmikill og liggur vel. Gott ef að þessi Corolla Cross hefur ekki bara smá karakter.

Helstu tölur:

Verð frá : 6.890.000 kr.

Hestöfl: 197 hö.

Vél: 1.987 rms., fjórir strokkar.

Rafmótor: 83 kW

Tog: 190 Nm.

Eyðsla bl.ak.: 5,6 ltr/100km. (hæsta gildi).

Eigin þyngd: 1.550 kg.

Dráttargeta: 750 kg.