Þeir hjá Lego eru sannarlega að kynda nostalgíuklefann ærlega þessa dagana! Ekki er langt síðan Porsche 911 kom á markað í „fullorðins“línu leikfangaframleiðandans, Creator Expert, og fjallað var um hér. Fyrirmyndin var 911 frá lokum áttunda áratugar síðustu aldar.
Litli og stóri saman. Hönnuðurinn lagði mikið upp úr að Lego-útgáfan væri nákvæm eftirlíking af T2. Mynd:LEGO
Af hverju „hippabíll“?
Bíllinn sem um ræðir er heldur betur til þess fallinn að kalla fram minningar hjá þeim sem tilheyra hippakynslóðinni, eða blómabörnunum. Þetta er nefnilega VW „rúgbrauð“ eða Volkswagen T2 Camper Van. Bíll sem þótti ævintýralegt að fara í langferðir á. Til dæmis var vinsælt að skottast á milli tónlistarhátíða í Bandaríkjum blómelskandi hippanna á slíkum bíl; nóg pláss, hægt að sofa í bílnum og já, ást, frelsi og friður.
„Jákvæðni og bjartsýni einkennir að jafnaði hippa og brimbrettafólk. Brettafólkið horfði eftir haffletinum, vakandi fyrir ákjósanlegri öldu. Hipparnir horfðu til framtíðarinnar, því þar var friðsældina að finna. Hvorugur hópurinn var að flýta sér, sem var líka eins gott, því bíllinn [the Microbus] var ekki nema 25 til 40 hestöfl!“
Enginn að flýta sér? Það var gott því þetta er ekki farartæki fyrir fólk á hraðferð. Mynd:Unsplash
„Nújá,“ hugsaði ég skeptísk. „Eru bara einhverjir hippar í handbremsu í vinnu hjá Lego í Danmörku? Er eina færa leiðin til að komast nálægt fortíðardraumi þeirra um að eignast hippabíl sú að búa hann til úr kubbum?“ Svona hugsaði ég nú kjánalega þegar ég skoðaði nýjasta apparatið frá Lego. En ég hafði rangt fyrir mér og hefst nú loks sagan sem átti að hefjast áðan!
Draumur í dós eða draumur um dós?
Sven Franic heitir maður og hann er ekki fastur í handbremsu. Sven þessi er oft einfaldlega kallaður „Lego Sven“ þar sem hann er mikill sérfræðingur í að skapa listaverk úr Legokubbum auk þess sem hann starfar sem hönnuður hjá Lego í Danmörku.
Þegar Sven var drullugur upp fyrir haus að gera við einhverjar dómsdagsdruslur á bílaverkstæðinu hér áður fyrr, var hann með hugann við einn tiltekinn bíl: VW rúgbrauð. Þó að „Lego Sven“ sé allt of ungur til að hafa náð svo mikið sem í skottið á hippatímabilinu þá dreymdi hann um að ferðast á „rúgbrauði“. Vera frjáls og fara í ævintýraferðir.
Sá draumur varð að veruleika fyrir áratug þegar Sven eignaðist ljósbláan T2 Camper Van´78. Það er gott að Sven er bifvélavirki að mennt og sennilega spilar það inn í þá staðreynd að hann á bílinn enn og ferðast fjölskyldan á þessum vagni, eins og sjá má t.d. á Instagram-síðu „Lego Svens“.
Sven „skellir í“ rúgbrauð
Þessi mikla ást Svens á T2 varð til þess að nú geta Lego-færir sett saman slíkan bíl úr 2.207 kubbum.
Hér er allt til alls fyrir ferðalagið. Mynd: LEGO
Á síðu leikfangaframleiðandans má lesa um öll smáatriðin sem einkenna hönnun Svens. Þar segir hann eitthvað á þessa leið (jú, aftur lausleg þýðing mín): „Þegar nýr Lego bíll er hannaður búum við til sögu í kringum verkefnið. Hérna [þ.e. við hönnun T2] horfðum við til útilegu- og útihátíðamenningarinnar sem tengist bílnum. Til þess að skapa réttu stemninguna er allt í bílnum sem þarf til slíkra ferðalaga; allt frá agnarsmáum vaski til pínulítils matarborðs. Það er meira að segja hægt að opna ísskápinn og næla sér í banana,“ segir hönnuðurinn Sven Franic.
Já, gott fólk, þetta er ekki búið. Þetta er rétt að byrja! En stiklum samt á stóru. Eða nei annars; leyfum þessu myndbandi að segja það sem segja þarf um smáatriðin:
Aðrar umfjallanir
Að bjóða vinum sínum upp á skyndibita í Tesla Model S Plaid er í lagi. En bíllinn er 1020 hestöfl og það virkilega gerist eitthvað þegar gefið er í! Þá flýgur matur t.d. út um allt en vonandi þykir eigandanum og sprellikarlinum Alex Choi eins gaman að þrífa og að aka bílnum.
Vörubílstjórar eru auðvitað á ferðinni á undarlegustu tímum og það er einmitt þá sem undarlegir hlutir eiga sér stað. Sögur bandarískra vörubílstjóra eru fjölmargar og hér er ein góð - um það sem ekki er á ferli í dagsbirtu!
Bentley verður bílaframleiðandi sem verður eingöngu með rafbíla árið 2030 þar sem stefnt er að því að vera kolefnishlutlaus framleiðandi í lok áratugarins, samkvæmt því...
Þegar sá blaðamaður hjá www.billinn.is sem þetta skrifar var staddur hér í þessum litla og friðsæla ferðamannabæ á Costa Blanca á liðnu hausti uppgötvaði hann að hér var að finna eina flottustu bílasölu eðalvagna á Spáni og jafnvel þótt víðar væri leitað.