Styttist í frumsýningu á nýjum Nissan Qashqai

• Prófunarferli á þriðju kynslóð þessa vinsæla sportjeppa frá Nissan er nærri því að ljúka áður en bíllinn verður frumsýndur síðar á árinu, en Auto Express var að birta myndir af bílnum í prófunum

Við hér á Bílabloggi erum þess næsta viss að það sé stór hópur aðdáenda Nissan Qashqai hér á landi sem bíði þess spenntur að sjá næstu kynslóð bílsins birtast, en þess má vænta að það gerist á næsta ári, jafnvel í byrjun ársins

Japanski framleiðandinn er nú að prófa bílinn, sem áður hefur sést í miklum felulitum úr fjarlægð í reynsluakstri á prófunarbraut, og nú við reynsluakstur á evrópskum vegum og þar með tókst njósnaljósmyndurum að ná myndum sem sýna nánari upplýsingar um útlit bílsins.

Kemur í sölu snemma á næsta ári

Þriðja kynslóð hins gríðarlega vinsæla sportjeppa mun fara í sölu snemma á næsta ári og stefnt er að því að bíllinn verði áfram smíðaður í verksmiðju japanska fyrirtækisins í Sunderland á Englandi.

Væntanlega ekki dísil

Þótt það sé ekki staðfest er búist við að Nissan muni ekki bjóða upp á neinar dísilvélar fyrir nýju gerðina, heldur muni bjóða upp á aukið úrval drifrásum með rafmagni, allt frá 48V mildum blendingsvalkostum til drifrásar með tengitvinnvalkosti sem byggir á Mitsubishi Outlander PHEV.

Í nýlegri endurreisn Renault-Nissan-Mitsubishi-bandalagsins munu fyrirtækin þrjú fara í „leiðtoga-fylgjanda“ nálgun og Nissan mun taka forystu um þróun CMF-grunnsins. Einnig eru viðræður um að flytja framleiðslu á Kadjar, sem er svipaður bíll, til Sunderland.

Qashqai er ein af helstu gerðum Nissan á heimsvísu og er í boði á öllum lykilmörkuðum fyrirtækisins, þó að hann sé seldur sem Rogue Sport í Bandaríkjunum.