Hvað varð um Star Wars Celicuna?
Í kringum frumsýningu Star Wars myndarinnar árið 1977 gekk Toyota til liðs við 20th Century Fox með því að græja gasalega fína Toyota Celica GT í Star Wars útfærslu. Bíllinn var verðlaunagripur í happdrætti. Frá september til desember 1977 var happdrættið auglýst og átti að tilkynna um vinningshafa snemma árs 1978.
Vinningshafi þessarar Celicu hefur enn ekki verið kynntur og ef einhver veit hvar bíllinn er niður kominn þá hefur hann aldeilis haldið sér saman um það öll þessi ár.
Umfjöllun um happdrættið og verðlaunin fjaraði smám saman út og gleymdist svo gott sem alveg á nokkrum mánuðum.
Morð mannrán og fíkniefni
Sagt var í auglýsingum að á húddi bílsins væri airbrush-mynd (sama og plakat myndarinnar) og alls konar fínerí um allan bíl. Fyrirtækið sem annaðist airbrush-verkið var Delphi Auto Design í Costa Mesa í Kaliforníu. Það fyrirtæki reyndist vera með allt niður um sig og skömmu eftir að Star Wars bíllinn var kynntur til leiks hætti þetta fyrirtæki störfum. Af hverju?
Jú, vegna tengsla við eiturlyfjaheiminn, mannrán og morð þá var rekstrargrundvöllurinn eiginlega ekki til staðar og því hvarf þetta kompaní af yfirborði jarðar, rétt eins og fólkið sem það var bendlað við að hafa rænt.
Eftir sem áður tókst manni nokkrum, Dean Shada að nafni, að hafa uppi á tveimur starfsmönnum hins horfna fyrirtækis. Fox fréttastofan greindi frá því árið 2016.
Var bíllinn yfirleitt til?
Eins og við var að búast gróf fréttastofa Fox nokkuð dýpra þegar hið dularfulla bílhvarf var til umfjöllunar á sínum tíma og fann út að yrirtækið sem hélt utan um happdrættið er enn starfandi og er það Marden-Kane í New York. Framkvæmdastjórinn, Alan Richter, sagði að upp á svo gamlar upplýsingar væri nú ekki haldið en hann nefndi líka að fleiri en Fox hefðu haft samband vegna þessa.
Fyrrnefndur Dean Shada, sem leitað hefur bílsins lengur en aðrir, komst að þeirri súru staðreynd árið 2016 að flestir sem höfðu haft eitthvað með þennan bíl að gera á sínum tíma væru hreinlega ekki lengur í tölu lifenda. Þeirra á meðal er eigandi fyrirtækisins Delphi Auto Design, John Sladek. Hann lést árið 2013 en Shada ræddi við ekkjuna og átti hún eitthvað af myndum og pappírum sem tengdust Star Wars bílnum.
Það sem var þó ekki á meðal gagna voru upplýsingar um hvaða tiltekni bíll þetta var; VIN-númerið góða. Ef það hefði fundist væri gátan nú sennilega ráðin. Eða í það minnsta auðveldara að finna út hvað varð um bílinn.
Hvort bíllinn hafi verið til er ekki gott að segja og hafi hann verið til virðist hann hafa gufað upp, blessaður.
Þær myndir sem birtar hafa verið eru flestar teikningar og það er kannski þess vegna sem maður fær á tilfinninguna að bíllinn hafi aldrei verið til í raun og veru.
Í fréttinni sem Fox birti árið 2016 kom fram að Dean Shada væri hvergi nærri hættur leitinni að bílnum. Kannski hann sé enn að leita. Hann sagðst sannfærður um að einhver vissi eitthvað eða að bíllinn „leyndist“ í bílskúrnum hjá einhverjum sem hefði ekki hugmynd um að þetta væri Star Wars bíll…
Þessu tengt:
Aðrar umfjallanir
„Ekki er öll vitleysan eins,“ sagði maðurinn og skrúfaði frá. Það þarf að huga að þrýstingnum þegar bíll er þveginn, ekki satt? Hér er ólögulegt bílbrak (afsakið Peugeot) „þvegið“ og þrýstingurinn ku vera 3000 bör. En stóra spurningin er: Hve mikill þrýstingur er hæfilegur þegar bíll er þveginn?
Nissan er að víkka sjóndeildarhringinn – bókstaflega. Fyrirtækið hefur hannað frumgerð tunglbíls í samstarfi við japönsku geimrannsóknarstofnunina.
Árið 1965 fór Ford Mustang eins hátt og unnt var að komast. Upp á hæsta skýjakljúf veraldar á þeim tíma, en það var Empire State-byggingin í New York. Alls er byggingin 102 hæðir en hæsti punktur byggingarinnar er 381 metri.
Gaurarnir hjá The Straight Pipes tóku nokkra góða spretti á völdum sporturum. Hvaða bílar finnst þér hljóma best?