Maður nokkur frá Cornwall, Tyler að nafni, áður Ben Granger, heldur því fram að hann sé launsonur Johns DeLorean (f.1925, d. 2005). DeLorean nafnið kannast flestir lesendur eflaust við en John DeLorean var maðurinn sem sérkennilega bifreiðin DMC DeLorean er kennd við.
Bíllinn sjálfur, launsonurinn og sá bílablaðamaður er þessi orð ritar koma öll úr fortíðinni, nánar til tekið frá því herrans ári 1981. Hafa árin farið misblíðum höndum um okkur og í sannleika sagt sýnist mér hrjúfar krumlur áranna ekki hafa komið nálægt ryðfríu stáli bílsins en hvað getur maður svo sem sagt um tímavélar. Eldast þær vel eða illa?
Merkileg tilviljun, þetta með árið 1981, en ef til vill ekkert til að hafa sérlega hátt um.
ÞríhjóLorean á markað innan árs?
Maðurinn sem um ræðir og segist vera sonur Johns DeLorean, mun samkvæmt alnetinu, hafa breytt nafni sínu úr Ben Granger í Ty [Tyler] DeLorean fyrir tæpu ári síðan en eitt og annað bendir til þess að maðurinn sá eigi í eilítilli rimmu við eigið sjálf.
Bifreiðin er í raun hið fallvalta (allavega valta) þriggja hjóla fyrirbæri Reliant Robin (eða Reliant Rialto) með „máva“vængjahurðunum (gull-wing doors ) sem kenndar hafa verið við DeLorean.
Ýmsar athugasemdir hafa verið gerðar við fréttirnar og margar eru þær spaugilegar.
Nú er staðan sú að DeLorean Motor Company hefur höfðað mál á hendur Ty, meðal annars fyrir að nota vörumerkið DeLorean. Hins vegar virðist fátt ef nokkuð hafa heyrst úr hinum óáreiðanlegu búðum Reliant, en stráksi notar bíla Reliant sem grunn bílsins sem hann segir að komi á markað innan árs: DeLorean DMC 1.21.
Húmor í karli
Bíllinn, sem launsonurinn segir að sé alfarið byggður á upprunalegri framleiðsluáætlun frá árinu 1981, mun fást bæði sem alrafmagnaður bíll og tvinnbíll.
„DeLorean DMC 1.21 er nýja rafmagnstímavélin sem getur farið með okkur til framtíðar. [..] Eins og staðan er í dag er þetta eina tímavélin sem virkar. Fjárfestu í einni slíkri í gær!“
Já, það er margt skondið á síðunni sem tileinkuð er bílnum sem hægt er að panta strax í dag til að missa ekki af herlegheitunum:
Gríngjörningur eða alvara?
Leikarinn og bíladellumaðurinn sem fór með aðalhlutverkið í myndunum Aftur til fortíðar, Mikki refur (Michael J .Fox) eins og ég kalla hann, var þrítugur þegar hann greindist með Parkinsonveiki.
Að þeim þætti undanskildum virðist allt í kringum „launsoninn“ og þríhjólabílinn vera grín. Á TikTok síðu Ty DeLorean er fjöldi myndbanda af honum sjálfum baða sig í heitum potti sem er, tjah...hvernig á ég að orða það, jú í Reliant 1.21 bíl. Bíllinn er heitur pottur. Þetta er virkilega mikið spes.
Sjálfur hefur Ty sagt að hægt sé að fá bílinn „með tilsniðnum heitum potti“ og að bíllinn geti flogið.
Að sjá manninn, í freyðibaði í „bíl“ leika sér með leikfangaútgáfu af DeLorean, bendir, eins og allt annað, til að ekki sé allt með felldu. Vonandi er þetta hluti af útskriftarverkefni í gjörningalist eða „hvernig-á-að-gabba-fólk“.
Engin þörf á DNA prófi
Í allri hringavitleysunni hefur nánast gleymst að spyrja út í faðernismálið. Blaðamaður Cornwall Live spurði Ty út í þau mál og svaraði hann
Sagði hann að starfslið Back To The Future (Back To The Future crew) hafi boðist til að greiða fyrir DNA próf en það er eitthvað sem Ty telur mega bíða fram yfir réttarhöldin.
Þannig var nú það! Hægt væri að skrifa mun meira um þetta kúnstuga mál en ætli undirrituð láti þetta ekki gott heita sem framlag til furðugjörnings Ben Granger eða Tyler DeLorean.
Aðrar umfjallanir
Peugeot hefur staðfest að framleiðandinn muni setja á markað hreina rafknúna útgáfu af nýjum 308 hlaðbak á næsta ári, sem mun keppa við bíla eins og Volkswagen ID.3 og Cupra Born.
Fyrir sléttum 119 árum settist maður að nafni Tom Fetch upp í 12 hestafla ökutæki og ók af stað frá San Francisco. Hann ætlaði til New York og þangað fór hann. En ökuferðin tók reyndar 61 dag!
Smart's #1, fyrsti bíllinn frá nýrri stöðu vörumerkisins sem rafknúinn samrekstur milli Geely og Mercedes-Benz, mun eiga fáa keppinauta sem lítill úrvals...
Það er ágætt að heyra hvað þeim sem lifa og hrærast í heimi bíla finnst best og verst af því sem þeir skoða. Mat Watson hjá CarWOW er virkilega mikill bílakarl og hér er samantekt hans á því flottasta og ljótasta á markaði 2022.