Nú er hann aftur falur, bíllinn sem Michael Schumacher keppti á 1998 í Formúlu 1. Við greindum frá því að bíllinn væri til sölu í byrjun mars síðastliðnum og hér er hann á uppboði fyrir öllu hærri upphæð. Uppboðið stendur frá deginum í dag, 18. ágúst og því lýkur þann 20. ágúst.
Ætli bíllinn myndi kosta meira ef Schumacher hefði unnið titilinn á honum? Tjah, það er nú það. En hvað eru milljónir til eða frá þegar um slíkan grip er að ræða? Hann er nefnilega metinn á 6 til 8 milljónir. Dollara sko! 850 milljónir íslenskra króna upp í rúman milljarð og öll þessi núll rugla fólk af málabraut hreinlega. Í það minnsta ruglast ég.
Verðmiðinn var 4.9 milljónir dollara í mars síðastliðnum en það var þá.
Ferrari F300 heitir hann og er frá árinu 1998.
Árið 1998 kepptu Schumacher og Mika Häkkinen um titilinn. Í lokakeppninni á Suzuka brautinni í Japan ræsti Schumacher fremstur en hann drap á bílnum fyrir upphitunarhringinn og varð því að ræsa fyrir aftan alla.
En Schumacher er ótrúlegur ökumaður; hann stormaði gegn um þvöguna og var kominn í þriðja sætið þegar hann ók yfir rusl á brautinni og skemmdi dekk.
Þremur hringjum síðar sprakk dekkið og titillinn féll í hlut Häkkinens. Við skulum gera ráð fyrir að búið sé að laga bilunina sem orsakaði að hann drap á bílnum fyrir keppnina.
En bíllinn er alla vega til sölu hér.
Ég fór aðeins að reikna hvernig best væri að gera þetta; það er að segja hvernig best væri að borga bílinn. Segjum til dæmis að manni bjóðist að dreifa greiðslum á 12 mánuði og gefum okkur að engir vextir eða aukakostnaður fylgi. Þá eru þetta rúmlega 70 milljónir á mánuði.
Það hljómar strax mun betur en að reiða fram 850 milljónir á einu bretti. Svo ekki sé talað um rúman milljarð...
Fleira þessu tengt:
Aðrar umfjallanir
Bílablogg reynsluók þessum flotta jeppa í gærkvöldi. Þar tókum við drónamyndir af jeppanum í sínum heimahögum
Nick Gibbs hjá Automotve News Europe fræðir okkur á því- Jaguar Land Rover situr uppi með pöntunarlista upp á tæplega 100.000 ökutæki þar sem fyrirtækið...
Núna þegar heimurinn er laus við Donald Trump og sæmilega viti borinn maður er kominn í hans stað í Hvíta húsið er vert að skoða bílamál hins...
Sumir bílaframleiðendur fá flippaðri hugmyndir en aðrir. Þegar Range Rover Sport 2014 var kynntur fyrir bílablaðamönnum á Englandi á sínum tíma, var þeim boðið að aka gegnum „bumbu“. Framleiðandinn keypti Boeing 747 þotu og bauð viðstöddum að láta reyna á „off road“ búnað bílsins á þennan óhefðbundna hátt.