Bílar sem voru látnir hverfa ofan í vatnsþró nokkra skammt frá Glasgow á tíunda áratug síðustu aldar, hafa loks verið fjarlægðir. Mörgum til ánægju er þessi fúli pollur nú minna fúll en áður og óþefurinn ekki eins stækur.

Glen Dam vatnsþróin í  Paisley er í 10 mínútna akstursfjarlægð frá miðbænum í Glasgow. Þar, í jaðri almenningsgarðs, hafa yfirvöld í fjögur ár vitað af níu bílum á botninum en bílarnir hafa sennilega verið þar síðustu 25 árin eða svo.

Í síðustu viku var „tappinn“ tekinn úr þrónni og bílflökin fjarlægð. Þegar vorar geta gestir almenningsgarðsins vonandi þefað af nýútsprungnum blómum í stað þess að anda að sér hinum óbærilega dauni sem lagt hefur af þessari „bílarotþró“ í svo mörg ár.

Enginn hefur stigið fram og greint frá hvers vegna bílarnir níu voru þarna en þeir fóru leynt, að óþefnum undanskildum. Áhugavert væri að vita hvers vegna einmitt þessir bílar luku akstri á þessum stað án þess að „nokkur“ tæki eftir.

Annað efni tengt dapurlegum örlögum bíla: 

Toyota-kirkjugarðurinn á hafsbotni

Skipið sokkið með hátt í 4000 bíla um borð

Bíllinn sem sökk með Titanic

Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.