Popparinn Noel Gallagher, sem oft er kenndur við hljómsveitina Oasis, er ekki með bílpróf. Það hefur þó ekki hindrað hann í bílakaupum. Það væri ekki í frásögur færandi nema sökum þess að hann keypti eitt sinn Jaguar fyrir 20 milljónir en steingleymdi því.
Gleyminn? Eða bara rosalega upptekinn náungi? Skjáskot/YouTube
Fyrrum gítarleikari Oasis, Noel Gallagher, varð mjög hissa þegar bílaflutningavagn stoppaði fyrir framan húsið hans með gasalega flottan Jaguar Mark II árgerð 1967. Hann vissi ekki hvaðan á sig stóð veðrið og horfði heillaður á ökutækið.
Í ljós kom að hann hafði, tveimur árum fyrr, keypt bílinn og látið sérfræðinga gera drossíuna upp. Það gerðu þeir og að verki loknu var bíllinn sendur heim til verkkaupans. Sá hafði steingleymt þessu öllu saman og varð að vonum undrandi.
Hann greindi frá þessu fyrir einhverjum árum síðan og segir sagan að bíllinn hafi farið beint inn í skúr og staðið þar óhreyfður síðan. Hvort það sé satt og rétt, þ.e. að enginn hafi ekið bílnum síðan þá, látum við liggja á milli hluta. Ljóst þykir þó að popparinn hafi ekki ekið honum þar sem hann hefur aldrei lært að aka bíl.
Í bresku sorp...afsakið, bresku pressunni, var haft eftir Gallagher að hann hafi á þeim tíma (sem hann keypti bílinn), ætlað sér að læra að aka. Það hafi hann þó ekki gert og þess vegna ekki hugsað meira um bílinn sem hann keypti fyrir tæpar 20 milljónir króna.
Úr viðtali sem hér er vitnað í. Skjáskot/YouTube
Hér er hlekkur á viðtal þar sem Noel Gallagher var spurður út í „dýrustu mistökin“ og þá nefndi hann einmitt þessa sögu; söguna af Jagúarnum.
Þetta er fremur sérstakur „fyrsti bíll“ en Gallagher sagðist hafa keypt hann því þeir væru af sömu árgerð: 1967. Reyndar kemur fram í viðtalinu sem vitnað er í hér að ofan að einu sinni hafi bílnum verið ekið (konan hans ók, enda með bílpróf) en síðan hafi Jaguar-inn staðið óhreyfður. Þetta rennir stoðum undir sögusagnirnar sem voru þá ekki alveg út í bláinn.
Bíllinn virðist vera til sölu núna á 125.000 pund (tæpar 22 milljónir króna) en nú er stóra spurningin hvort nokkur þori að kaupa bílinn ef ske kynni að eigandinn, Noel nokkur Gallagher, skyldi hafa gleymt að hann ætlaði að selja bílinn. Bíllinn er í góðu standi, ónotaður og vel upp gerður en tæknilegar upplýsingar um bílinn má finna hér.
Aðrar umfjallanir
Nýr Peugeot hugmyndabíll verður frumsýndur í ársbyrjun 2023 og mun forsýna hönnun framtíðarbíla frá franska vörumerkinu...
Skoda mun enn og aftur bjóða upp á stationgerð í flokki minni bíla þegar fyrirtækið kynnir arftaka Fabia á næsta ári og heldur áfram með form yfirbyggingar sem...
Hér er gott dæmi um mann sem hefur misskilið eitthvað allverulega en þetta er Joe nokkur Mullins sem á það til að misskilja eitt og annað. Til dæmis misskildi hann hlutverk sitt, hámarkshraða og síðast en ekki síst hraðasektina sem hann fékk í síðasta mánuði.
Árið 2007 birtst Mini sem blæjubíll í Sidewalk-útgáfu á hörðum vetrardegi á bílasýningunni í Detroit til að sýna þetta sérstaka útlit...