Hefurðu heyrt söguna af Samir? Hinum hræðilega bílstjóra? Þetta er mögnuð og jafnframt fáránleg saga af gríni sem spunnið hefur örlagaþráð í lífi margra frá 2013. Enn sér ekki fyrir endann á þeim ósköpum sem hófust með nokkurra mínútna talsetningu YouTube myndbands.

Áhorfstölur segja sitt um hversu vinsælt myndbandið hefur verið en sú útgáfa sem hér er stuðst við hefur verið spiluð yfir 20 milljón sinnum á YouTube síðan í mars 2014. Hafið í huga að þetta er ekki einu sinni fyrsta útgáfan því sú kom á YouTube árið 2013 en hana er ekki lengur að finna. Var hún 3:30 mínútur að lengd en ýmsar styttri útgáfur hafa lifað góðu lífi til dagsins í dag og sennilega hafa lesendur séð einhverja þeirra.  

Það er samt eiginlega nauðsynlegt, áður en sagan af þeim félögum verður sögð, að horft sé á umrætt myndband, það er að segja eina útgáfu þess sem er 2 mínútur að lengd. Svo verður rakið hvernig þetta atvikaðist allt saman!

Alls ekki lélegur bílstjóri og kóarinn reynslumikill

Það er svo margt sem er ekki alveg rétt á internetinu; stundum er um saklaust grín að ræða en stundum er grínið meiðandi og getur jafnvel skemmt fyrir fólki. Eins og í þessu tilviki.

Þegar grennslast er fyrir um „versta ökumann í heimi“ og „hræddasta aðstoðarökumann rallsögunnar“ kemur nefnilega eitt og annað í ljós sem lítið hefur verið fjallað um, alla vega í samanburði við myndbandið útbreidda.

Samir var enginn nýliði þegar þarna var komið sögu árið 2013 enda þreytti hann frumraun sína í indverska rallinu árið 1992, fyrir þrjátíu árum síðan. Árið 2014 vann hann sex titla og árið 2013 var hann í þriðja sæti yfir heildina í INRC (Indian National Rally Championship).

Kóarinn eða aðstoðarökumaðurinn eins og maður á auðvitað bæði að skrifa og segja, Vivek Ponnusamy, hafði sömuleiðis keppt í akstursíþróttum í rúma tvo áratugi þegar grínið var birt árið 2013.

Langlíf ósannindi og glataður ferill  

Enn þann dag í dag er fjallað um þá félaga sem hlægilegustu ralláhöfn sögunnar – allt út af þessu talsetta myndbandi. Þó svo að löngu sé komið í ljós að um grín hafi verið að ræða þá hafa þau skilaboð ekki komist sérlega vel til skila. Margir trúa því að þarna hafi tveir kjánar verið á ferð og hefur verið hlegið dátt að myndbandinu.

Tuttugu og tveggja ára ferill aðstoðarökumannsins Viveks Ponnusamy var í raun alveg í klessu um leið og myndbandið náði eyrum og augum heimsins. Enda hljómaði maðurinn (sem talaði fyrir Ponnusamy) eins og algjört flón. Skömmu eftir birtingu var risastórum akstursíþróttasamningi rift við blessaðan manninn. Svona trúðu margir að myndbandið væri ekta.

Sá handtekni

Indverskir fjölmiðlar greindu frá því í lok ágúst 2013 að maðurinn sem lögregla handtók hafi verið á vegum keppinautanna og var sagt að hann hefði gengist við því að hafa átt við umrætt myndband. Myndband sem Samir hafði deilt og var það 40 mínútna langt en sá handtekni bjó til fyrrnefnda 3:30 langa útgáfu með aukahljóðum.

Já, lesendur góðir. Þetta er æði ruglingsleg frásögn, enda er málið með eindæmum ruglingslegt og ber heimildum ekki alltaf saman, eins og sjá má þegar smellt er á krækjur hér og þar í greininni.

Síðan þá hefur Samir komið víða við; meðal annars í Pandora skjölunum, í fangelsi og svo er hann framkvæmdastjóri risavaxins iðnveldis og í hópi ríkustu manna Indlands.

Aðstoðarökumaðurinn Vivek Ponnusamy virðist í dag vera framleiðandi dekkja sem munu eiga sérstaklega vel heima undir rallýbílum.

Annað álíka galið: 

Formúluökumanni rænt

Þegar sonur forsætisráðherra týndist

Kannist þið við þá Farouk og Hassan Schumacher?

Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.