Elvis, Elias og fallegi bíllinn
Elvis Presley átti það til að tjá vináttu og þakklæti með því að gefa fólki bíla. Ekki blóm heldur bíla. Það er fallegt og sennilega ekki mjög algengt. Í það minnsta hefur maður ekki reynslu af slíku sjálfur. Elvis gaf lækninum sínum m.a. Stutz Blackhawk árgerð 1971 og Mercedes-Benz.
Elias Ghanem og Elvis Presley
Elias Ghanem (1939-2001) fluttist frá Palestínu til Bandaríkjanna árið 1963. Hann hlaut styrk til læknanáms við Duke University í Norður Karólínu. Árið 1971 fluttist Elias til Las Vegas og þar byrjaði áhugavert ævintýri. Ævintýri sem margar stórstjörnur blönduðust inn í og þar á meðal sjálfur Elvis Presley.
Bjó í bílnum fyrst í stað
Bílar koma nokkuð við sögu þegar rýnt er í feril læknisins en þegar hann kom til Bandaríkjanna var hann alveg staurblankur. Hann hafði jú hlotið námsstyrkinn en annars var aleigan 90 dollarar sem hann geymdi kuðlaða saman í buxnavasanum.
Mynd tekin í kringum 1973 og þarna eru þeir Elias, Elvis og Don Robertson.
Eftir að Elias kynntist Elvis varð auðvelt að njóta þessa lystisemda lífsins því lækninn skorti ekki aur eftir það. Hann var margmilljóner þegar hann dó árið 2001: Átti þotur, glæsihýsi, veitingastaði, bílaflota og ýmislegt sem kostar sitt.
Þessi er nú rennilegur. Og þennan bíl áttti læknirinn.
Margt þótti torkennilegt í kringum þennan mann og var hann undir eftirliti alríkislögreglunnar eftir andlát Elvis Presley. Þótti bókhald læknisins eitthvað undarlegt rétt eins og þau lyf sem hann ávísaði í stórum stíl og fólk hrökk upp af standinum allt í kringum hann.
Af einhverjum ástæðum var Elias Ghanem með fullt af lyfjum heima hjá sér sem stíluð voru á Elvis Presley. Annar læknir ávísaði lyfjunum en þau voru geymd í læstum skáp á heimili Ghanems. Ekkja Ghanems sagði frá þessum undarlegheitum þann 15. ágúst 2012, daginn sem 35 ár voru frá andláti Presleys.
Aldrei var hann ákærður og þó margt hafi þótt grunsamlegt við Dr. Elias Ghanem er ekki annað hægt að segja en hann hafi komið ár sinni vel fyrir borð. Hann lifði eins og kóngur en dó úr krabbameini árið 2001, þá 62 ára gamall.
Hvað með bílinn?
Jú, þetta var löng saga eða langur inngangur. Kjarni málsins er sá að einn þeirra bíla sem Elvis gaf lækninum er nú á uppboði. Bíllinn sem um ræðir er Stutz Blackhawk árgerð 1971. Pappírar fylgja bílnum sem sýna að þetta er víst bíllinn sem doktorinn fékk frá Elvis.
Reyndar keypti Elvis þrjá ef ekki fjóra bíla af þessari gerð en þetta er fyrsti Blackhawk-inn sem var seldur og hann eignaðist Elvis 9. október 1970.
Í mælaborði bílsins er plata sem eftirfarandi stendur á: „Elias Ghanem/A True Friend/Elvis Presley“.
Ekki virðist Elias hafa ekið bílnum mikið því að mælirinn segir 31.856 mílur. Í þessum tiltekna bíl er margt voðalega fínt og spes.
Vínskápur, minkafeldur, 24 karata gullskreytingar og ég veit ekki hvað fleira er í bílnum. Jú, það er 7.5 lítra Pontiac V8 vél en í raun fer ákaflega lítið fyrir tæknilegum upplýsingum á síðu uppboðsins. Hér er það helsta en annars segja myndirnar sitt.
Myndir af bílnum eru allar af vef uppboðshaldarans, Mecum Auctions
Tengt efni:
Aðrar umfjallanir
Nokkuð hefur verið fjallað um væntanlegan Land Rover Defender 130 og nú hefur Land Rover staðfest að lengsta útgáfan...
Lengri ábyrgðatími bíla hefur verið að færast í vöxt víða um heim og hefðbundin lögbundin ábyrgð í mörgum tilfellum framlengd, í sumum tilfellum í nokkur ár...
Þær rispuðu lakkið, fóru upp á þak og skemmdu bæði framrúðu og rúðuþurrkur. Þær voru tólf saman, geiturnar sem gerðu aðsúg að lögreglubílnum. Mæja sat í súpunni en hún átti að gæta geitanna.
Daimler og kínverski samstarfsaðilinn Geely hafa kynnt nýjan rafknúinn jeppa fyrir vörumerkið Smart sem fer í fjöldaframleiðslu á næsta ári...