Toyota söluhæsta merki ársins 2019 og veruleg aukning í sölu vistvænna bíla

Spá söluaukningu nýrra bíla á árinu 2020

Bílgreinasambandið hefur birt tölur yfir bílasöluna á árinu 2019. Af einstökum tegundum þá er Toyota söluhæst, í öðru sæti er Kia og Hyundai í þriðja sæti. Hlutfall vistvænna bíla hefur aukist upp í 27,5& miðað við 20,7% árið á undan. Bílaleigur keyptu 41,5% af seldum nýjum bílum.

Aðeins minni sala árið 2019 miðað við 2018

Sala nýrra fólksbíla á árinu 2019 var nokkuð minni en 2018 en í heildina seldust 11.728 nýir fólksbílar árið 2019 en 17.976 bílar árið 2018. Varð því samdráttur um 34,8% á milli ára en þó má segja að samanburðurinn milli ára hafi farið batnandi eftir því sem leið á árið. Í desember varð til að mynda 22,0% söluaukning þegar 587 bílar seldust borið saman við 482 bíla í desember 2018 og er þetta í fyrsta skipti í næstum 2 ár þar sem söluaukning verður í einstökum mánuðum á milli ára.

Salan er rétt yfir meðaltali frá aldamótum

Ef horft er lengra aftur í tímann og salan skoðuð frá aldamótum þá hafa um 11.400 fólksbílar selst að meðaltali á ári og salan 2019 er því rétt yfir meðaltalinu. Einnig má hafa í huga að árin 2016-2018 voru mjög stór bílasöluár í sögulegu samhengi og því víst að samanburðurinn við þau yrði alltaf erfiður þó ekki hafi verið búist við alveg eins miklum samdrætti og raun ber vitni.

Þetta sýnir sig m.a. í því að meðalaldur bílaflotans fer enn hækkandi hér á landi og er í dag 12,3 ár á meðan meðalaldurinn í Evrópusambandinu er 10,8 ár. Endanlegar sölutölur fyrir árið 2019 frá Evrópu liggja ekki enn fyrir en miðað við stöðuna í lok nóvember þá mun 2019 líklegast enda nokkurn veginn á pari við 2018.

Bílaleigur keyptu 41,5% seldra nýrra bíla

Af þeim 11.728 sem seldust á árinu þá keyptu bílaleigur 4.866 bíla eða 41,5% hlutfall. Hlutfallið er í takti við flest ár frá 2009 þegar bílaleiguflotinn fór stækkandi vegna fjölgunar ferðamanna en bílaleigur hafa að meðaltali keypt um 42,6% allra nýrra bíla síðan þá.

Það liggur því fyrir að endurnýjunarþörfin á þessum hluta flotans á hverju ári er mikil og því viðbúið að bílaleigur skipi áfram stóran sess í kaupum á nýjum bílum á næstu árum.

Hlutfall vistvænna bíla hækkar

Hlutfall vistvænna bíla (rafmagn, tengitvinn, hybrid, metan) hélt áfram að aukast og hefur hlutfall þeirra af heildarsölu aldrei verið hærra eða 27,5%.

Eru þetta hlutfallstölur sem eru fáheyrðar annarsstaðar í heiminum fyrir utan Noreg og er líklegt að Ísland verði áfram í fararbroddi þar sem horft er til framlengingar á ívilnunum vegna vörugjalda við kaup á slíkum bílum. Er í því tilliti gleðiefni að tekið var undir tillögur Bílgreinasambandsins í nefndaráliti Efnahags- og viðskiptanefndar um að framlengja ívilnanir vegna tengitvinnbíla til 2023 í stað þess að fella þær niður með öllu í lok 2020 því dæmi erlendis frá hafa sýnt að slíkt hefur hægt verulega á þessarar tegundar bíla.

Toyota söluhæsta vörumerkið

Toyota var söluhæsta vörumerkið á árinu með 16,8 % hlutfall sölunnar, þar á eftir fylgdu KIA með 12,6 % og Hyundai með 6,8 %.

Þá er einnig líklegt að bílaleigur þurfi að halda áfram að endurnýja flotann sinn þar sem hann hefur elst á síðustu misserum. Meðalaldur fólksbílaflotans er einnig að hækka en stórir árgangar í bílaflotanum eru komnir á meðalaldur sem í fyrra var 12,3 ár og fer hækkandi. Bílgreinasambandið spáir því að 12.750 bílar seljist á árinu 2020 og verður það þá 8,7% söluaukning frá árinu 2019.