Til eru ótal síður á alnetinu þar sem fullyrt er að fáránlegar umferðarreglur séu hér og þar í heiminum. Einkum og sér í lagi í hinum og þessum fylkjum [ríkjum] Bandaríkjanna.

Bannað að blóta

Það er auðvitað ruddalegt að blóta eins og sótraftur án almennilegs tilefnis. Í Rockville í Maryland má hver sorakjaftur gæta sín, burtséð frá því hvort almennilegt tilefni sé til þess að blóta hressilega eður ei. Það er nefnilega einfaldlega BANNAÐ!

Kalifornía til fyrirmyndar

Það má segja ýmislegt um kjánalegar umferðarreglur (sé tekið mið af spekingum á veraldarvefnum) í Kaliforníu en gaman er að greina frá því að í reglunum er eitt og annað sem er algjörlega til fyrirmyndar:

Bannað er að vera með heyrnartól eða eyrnatappa í báðum eyrum meðan á akstri stendur. Heyr heyr! Hversu oft sér maður ekki bílstjóra með heyrnartól? Allt of oft. Allt frá nettum heyrnartólum til svakalegra hlemma eins og maður myndi nota í skipasmíðastöð.

Úr sloppnum kona góð

Á villta tryllta vefnum, alnetinu, las ég á óáreiðanlegri síðu að í Kaliforníu væri konum óheimilt að klæðast slopp við akstur. Það hljómar nú eins og hver annar brandari, einkum og sér í lagi þegar hugsað er til allra þeirra sem fara út um hvippinn og hvappinn íklæddir náttfötum… Náttbuxur virðast á einhvern óútskýranlegan hátt hafnar yfir alla gagnrýni hér á landi og vogar maður sér ekki að minnast orði á að einhver sé eins og bjáni úti í búð í náttbuxum.

Það var ekki neitt að finna um stóra sloppabannið í lögunum. Hvorki tangur né tetur! Mögulega hefur einhvern tíma verið í gildi lögreglusamþykkt eða eitthvað í þá veru sem laut að sloppum en ekki er að sjá að þetta eigi sér stoð í lögum.

Ekkert brask á sunnudögum

Undirrituð var sannfærð um að það væri flökkusaga að í einhverjum fylkjum væri bannað að selja bíla á sunnudögum. Svo sannfærð að ég ætlaði að skauta framhjá þessari dellu. En forvitni blaðamaðurinn varð auðvitað að ganga úr skugga hvort eitthvað væri hæft í þessu og, viti menn! Þetta er satt!

Í fylkinu Maine, sem er á austurströnd Bandaríkjanna, er sala bifreiða á sunnudögum bönnuð. Hvorki má leggja drög að kaupum, sölu eða skiptum notaðra né nýrra bíla á sunnudögum. Refsing bíður þeirrar óheillakráku sem virðir þessi lög að vettugi, eins og sjá má í lögunum.

Hvíldardagurinn er því á einhvern hátt fjandsamlegur þegar bílabrask er annars vegar en auðvitað hefur maður slíkar trúarvenjur ekki í flimtingum. Höfum þetta bara í huga ef til stendur að bílabraska á þessum slóðum.

Ungir ökumenn og farþegabann

Í fyrsta lagi kann okkur að finnast stórfurðulegt að einhvers staðar fái ungmenni, yngri en 17 ára, ökuréttindi. Það er kannski ekki fyndið en ólíkt því sem við eigum að venjast hér á landi. Almennt er bílprófsaldurinn í Bandaríkjunum 16 ár og þannig hefur það verið frá því um 1940.

Víðsvegar um Bandaríkin mega börn byrja að læra á bíl, haldið ykkur fast og spennið beltin, FJÓRTÁN ára gömul! Já, það er alveg grjótmögnuð staðreynd.

Idaho með sín sérkenni

Í Idahofylki geta börn öðlast ökuréttindi, takmörkuð ökuréttindi, 15 ára gömul. Almennt skírteini fá þau við 18 ára aldur. Fimmtán ára gömul mega þau aka einsömul til og frá skóla eða vinnu en þau þurfa að hafa lokið ökukennslu (þarf virkilega að taka það fram? Já, það þarf víst!).

Þeir sem eru yngri en 17 ára þurfa að hafa lokið 6 verklegum ökutímum til að fá skírteinið. Meira virðist lagt upp úr bóklega hluta námsins því 30 stundum þarf að ljúka af bóklegri kennslu.

Vonbrigði

Það var auðvitað ekki leiðinlegt að garfa í þessum meintu stórfurðulegu reglum. Maður lærir alltaf eitthvað, en ekki neita ég að vonbrigðin voru töluverð þegar í ljós kom að hvergi (í minni yfirferð - vel ígrundaðar ábendingar vel þegnar) er áreiðanlegar heimildir að finna fyrir því að:

‍

Tengt efni sem þú gætir haft áhuga á:

Misvondar afsakanir og hraðasektir

Ökukennsla: Þegar allt klikkar!

Hvað finnst þér, lesandi góður? Smelltu hér til að skapa umræður við Facebookfærslu þessarar greinar! Og endilega láttu þér „líka“ við okkur á Facebook til að missa ekki af fréttum úr bílaheiminum.