Munið þið eftir AMC Concord?
Árið var 1978 þegar foreldrar mínir keyptu sinn fyrsta og eina ameríska bíl. Sá var af gerðinni AMC Concord 1978 árgerð. Bíllinn var búinn sex strokka, 236 cu, 3,8 lítra vél sem gerði bílinn sérstaklega skemmtilegan akstursbíl.
Þessi Concord er árgerð 1979 og var til sölu á netinu í fyrra.
Concord var byggður á níðsterkum AMC Hornet. Sá var svolítið klunnalegur og mörgum þótti hann ljótur. Concordinn var aðeins fríðari og búið að hengja á hann slatta af skrauti.
Lúxus á betra verði
AMC menn endurbættu Concordinn með tilliti til þæginda. Til dæmis voru sætin plussklædd, stór og mjúk, mælaborðið var frekar klossað en það var plastklætt með viðaráferð og náði sú klæðning yfir allt mælaborðið.
Amerískt yfirbragð og skemmtilegur íverustaður.
Sérstakur bíll
Árið 1978 var salan á Concord meira en helmingur framleiðslu allra bíla hjá AMC. Minnsti bílaframleiðandinn í USA var með „hittara”. Í auglýsingum var lögð áhersla á nýjan lúxus í „réttri” stærð en bíllinn var mun minni en margir bílar áttunda áratugarins.
10.4 sekúndur í 100 km. á klst. og hámarkshraði 160 km. klst. Hjóðlátur, silkimjúkur og stýrið lauflétt vökvastýri. Vökvabremsurnar voru hættulega nákvæmar.
Egill Vilhjálmsson bílaumboð
Ég var tólf ára. Við mamma og pabbi sóttum þennan bíl niður í Egil Vilhjálmsson. Egill Vilhjálmsson var til húsa á horni Rauðarárstígs og Laugavegs, beint á móti Hlemmi. Ég man að bíllinn kostaði í kringum 3,7 milljónir á verðlagi þess tíma (1978).
Ég man lyktina af ryðvörninni, bóninu og terpentínu – kölluð “nýjalykt” og það var plast á sætunum sem ekki var tekið af fyrr en heim var komið.
Ég féll alveg fyrir hljóðinu í vélinni á leiðinni heim.
Ég stalst til að keyra
Ég elskaði þennan bíl og þetta er sá bíll sem fjölskyldan átti hvað lengst, ein þrjú ár minnir mig.
Þegar „bón” stundirnar urðu lengri og fleiri fór ég að stelast út úr innkeyrslunni og aka aðeins um hverfið (við bjuggum á þessum tíma í Setbergslandi í Hafnarfirði) en á þeim tíma voru bara malarvegir um hverfið.
Þessi bíll er nákvæmlega eins og bíll foreldra minna - sami litur og árgerð 1978.
Oft ók ég inn að skemmu svokallaðri þar sem nú er ekið upp Klettahlíðina í Hafnarfirði.
Þegar þessi bíll var seldur fór hann til Keflavíkur og var í eigu sama aðila í hartnær aldarfjórðung eftir því sem ég best veit.
Upphaflega var númer bílsins R 1776. Númerið er enn notað í fjölskyldunni. Skyldi þessi fákur ennþá vera til?
(Myndir: Víðs vegar af netinu).
Aðrar umfjallanir
Allt frá því að GM hætti framleiðslu á bensínháknum sínum, Hummer, árið 2010, byrjuðu strax vangaveltur um endurkomu bílsins, hugsanlega...
Íslandsunnandinn og Top Gear maðurinn Ollie Marriage er ekki bara heillaður af Íslandi eftir allt saman. Hann er líka mjög hrifinn af nýja „rúgbrauðinu“ eða „rafbrauðinu“ ID Buzz.
Hér gefur að líta þær flottustu endurgerðir sem undirritaður hefur séð lengi...
Nikolina Brnjac, íþrótta- og ferðamálaráðherra Króatíu er greinilega ekkert blávatn! Hér er hún á blússandi ferð í Ford Puma rallýbíl og ökumaðurinn er enginn annar en Craig Breen. Svona eiga ráðherrar að setja sig inn í málin!