Sjaldgæfur Bentley til sölu á Íslandi
Það leynast alls konar gersemar í íslenskri bílaflóru en ein slík er til sölu þessi misserin. Um er að ræða 1995 árgerðina af Bentley Turbo S sem er afar óvenjulegt apparat miðað við það sem almennt kom frá Crewe í Bretlandi á þessum tíma. Bentley Turbo S er nefnilega 2,5 tonna flikki sem þó er 402 hestöfl og aðeins 6,1 sekúndu í hundraðið sem verður að teljast magnað fyrir bíl af þessari stærðargráðu.
Talandi um stærð – hann er lágur þrátt fyrir allt, aðeins 1485 mm á hæð, 5268 á lengd og 2008 á breidd.
En þetta er dýrgripur fyrir margra hluta sakir. Fyrir það fyrsta voru aðeins 60 svona bílar framleiddir, þótt til stæði að framleiða 75 stykki en allir voru bílarnir sérútbúnir og bæði öflugri en aðrir Turbo bílar frá Bentley og miklu betur útbúnir. Af þessum 60 bílum voru 31 með stýrinu vinstra megin og þessi tiltekni bíll er númer 22 af þeim 75 sem fyrirhugað var að framleiða eins og fram kemur á merkingum í bílnum.
Ekta eintak fyrir safnara
Á meðal óvenjulegra atriða er sérsmíðuð valhnetu viðarinnrétting með ámáluðu „B“ til marks um að þetta sé sérútgáfa af bílnum og svo er jafnframt sérstakt hulstur á milli framsætanna sem hefur að geyma viskí- og rommpela og fjögur kristalsstaup – nokkuð sem er sennilega eins ópólitískt rétt og hægt er í bíl, en á sama tíma mjög Bentley-legt.
Turbo S bílarnir eru búnir 6,75 lítra V8 vél eins og aðrir Bentley bræður en til viðbótar er Garret túrbína og loft- og vatnskældur intercooler notaður til að ýta aflinu í 402 hestöfl. Turbo S bílar eru styttri en venjulegir Bentley Turbo og miklu liprari í akstri. Bíllinn á sér þannig séð enga forvera né arftaka því Arnage bílarnir tóku við og Turbo R bílarnir þóttu ekki vera sama eðlis né hafa sömu eiginleika og Turbo S.
Það er erfitt að eignast glæsilega klassíska bíla á Íslandi en hér er komið kærkomið tækifæri fyrir safnara af lífi og sál. Upprunalegt lakk, allt vottað, þekkt eigendasaga og algjörlega óskemmdur og óslitinn bíll sem hefur mikið söfnunargildi.
(Ath. að fréttin er frá árinu 2019)
Aðrar umfjallanir
Sá sem þetta skrifar hefur oft verið spurður að því hvaða bíll sé sá flottasti sem af þeim bílum sem eru minnisstæðir frá 47 ára tímabili sem bílablaðamaður...
Bíllinn á myndunum með þessari frétt er frumgerð Honda að nýjum bíl - e:Ny1 - sýnishorn af nýjum bíl sem kemur á næsta ári sem Honda segir að verði „miðpunkturinn“...
Hefur þú séð formúlubíl á keðjum? En í snjó? Það hefur auðvitað ýmislegt verið gert til að vekja athygli á Formúlu 1 og sumt er eftirminnilegra en annað. Hér segir frá því þegar átján ára strákur ók formúlubíl á skíðasvæðinu í Kitzbühel í Austurríki.
Það er mörgum eigendum sportbíla af gerðinni Ford Mustang hrein kvöl og pína að sjá Mustang-merkið á Ford Mustang Mach-E. „[Bíllinn] hefði aldrei átt að fá að nota nafnið Mustang,“ segir í grein bílablaðamanns.