Tveggja dyra skutbíll

Tími skutbíla er síður en svo liðinn þó svo að tveggja dyra þannig bílar hafi sungið sitt síðasta fyrir áratugum.

Þeir voru hannaðir fyrir barnmargar fjölskyldur með minna á milli handanna. Sumir kaupendur sáu það einnig sem kost að hafa börnin aftur í og vera örugg um það að þau opnuðu nú ekki afturhurðir og féllu út.

Ekki eins vinsælir

Þó svo að fáeinir bílaframleiðendur rembdust eins og rjúpan við staurinn að halda áfram með tveggja dyra bíla eins og Ford Pinto og Chevy Vega náðu þeir ekki þeim vinsældum sem svipaðr fjögurra dyra bílar nutu.

Fyrst og fremst fjölskyldubíll

Chevelle, tveggja dyra skutbíllinn var framleiddur árin 1964 og ´65 og var þá boðinn sem valkostur meðal fjögurra dyra systkina sinna. Bíllinn sem um er rætt er hugsaður sem ´64 módel en með ´65 grilli. Að öðru leyti á bílinn að vera nánast eins og þegar hann kom úr verksmiðjunni. Hann hefur verið lækkaður eilítið og merktur Malibu með 350, V8 mótor og má segja að það séu einu marktæku frávikin.

Takið eftir svörtu stálfelgunum með litlu krómuðu koppunum og rauðu strípunni í dekkjunum.

Eflaust gaman að eiga

Að innan hefur frelsið í endurbyggingunni verið örlítið meira. Bekkurinn frammí sem er sérsniðinn er með armpúða í miðjunni og hurðaspjöldin eru sérsmíðuð. Nýtísku stýri hefur verið sett á stýrissúluna og miðstöðvartakkarnir settir neðst í mælaborðið en þó í gamaldags miðstöðvareiningu. Einnig hefur nýtísku skífum verið komið fyrir í mælagluggana og rafmagnsupphölurum frammí, afturí og í skotthlera.

Undir vélarhlífinni er 5,7 lítra V8 mótor, tjúnaður til að gefa 335 hestöfl út í hjól sem togar um 470 Nm. Bíllinn er síðan með 12 bolta mismunadrifi með tregðulæsingu að aftan.

Þetta er þá kannski ekki alveg þessi týpíski „annar bíll“ á heimili til að skreppa í Bónus og skutla krökkunum eins og hann var hugsaður í upphafi. Hins vegar er hann nánast eins og nýr og verðugur höfðingi tveggja dyra skutbílanna sem safngripur í framtíðinni.

Byggt á grein Autblog