Vel heppnað málþing í Reykholti um gamla bíla
Margir skemmtilegir eldri bílar komu í heimsókn í góða veðrinu
Þeir voru ófáir gömlu eðalvagnarnir sem skörtuðu sínu fegursta í blíðunni í Reykholti laugardaginn 4. júní 2022. Í Snorrastofu var nefnilega haldið málþing og var umfjöllunarefnið gamlar bifreiðar, varðveislugildi þeirra og sögulegt samhengi.
Megintilgangur málþingsins var að fjalla um þau bílasöfn sem eru á landinu í dag og forsögu þess að farið var að huga að því að geyma gamla bíla og varðveita þá.
Bergur Þorgeirsson, forstöðumaður Snorrastofu, setti málþingið, og fór nokkrum orðum um starfsemina og aðstöðuna í Reykholti.
Hann kynnti síðan til leiks Snorra Jóhannesson bónda á Augastöðum sem var dagskrárstjóri og stjórnaði samkomunni.
Fyrstur á mælendaskrá var Þór Magnússon, fyrrverandi þjóðminjavörður: Bifreiðar í vörslu Þjóðminjasafnsins. Hann fór í nokkuð löngu máli yfir þróun mála á meðan hann var í forsvari fyrir Þjóðminjasafnið, en lítið hefur borið á bílum safnsins í seinni tíð.
Næstur var sá sem þetta skrifar og fjallaði stuttlega um upphaf bílaaldar á Íslandi fyrstu fimm áratugina. Stiklaði á stóru og dró upp nokkur minningabrot frá þessu tímabili.
Síðastur á mælendaskrá fyrir kaffihlé var Bjarni Guðmundsson sem fjallaði um Landbúnaðarsafnið á Hvanneyri.
Eftir kaffihlé byrjaði Andri Guðmundsson og fjallaði ítarlega um Samgöngusafnið á Skógum, allt var þetta fróðlegt.
Þeir Bjarni Þorgilsson og Rúnar Sigurjónsson frá Fornbílaklúbbi Íslands voru næstir og fjölluðu á ágætan hátt um varðveislu og verkkunnáttu varðandi gamla bíla.
Sverrir Ingólfsson fjallaði síðan á skemmtilegan hátt um samgönguminjasafnið að Ystafelli, og sýndi okkur nokkur dæmi um gamla bíla sem hafa gengið í endurnýjun lífdaga hjá þeim á safninu.
Margir skemmtilegir bílar á staðnum
Veðurguðirnir léku við þá sem komu á þetta málþing í Reykholti og því voru örugglega mun fleiri gamlir og glæsilegir bílar komnir á staðinn.
Hér á eftir kemur myndasyrpa frá Reykholti á laugardaginn.
Kynnir málþingsins í Reykholti var Snorri bóndi Jóhannesson á Augastöðum, annáluð refaskytta, en hann sótti þennan bíl vestur um haf fyrir nokkrum árum og keyrði drjúga vegalengd til að koma honum í skip.
Fallegur bíll sem var hér í hópi svipaðra eðalbíla að vestan.
Nokkrir aldnir hópferðabílar komu í Reykholt. Næst á myndinni er hin landsfræga „Soffía“ sem á einmitt rætur að rekja til staðarins.
Sá „guli“ er Ford Consul árgerð 1955 í eigu Tryggva í Reykholti.
Nokkrir flottir Benz-bílar sem Tryggvi í Reykholti hefur gert upp.
Þessi flotti „Vípon“ R-350 var gangsettur sérstaklega til að koma í heimsókn í Reykholt á laugardaginn.
Einstakt og einfalt „hjólhýsi“ – byggt á jeppakerru, var meðal þess sem sjá mátti í Reykholti á laugardaginn.
Aðrar umfjallanir
Ójá! Það er fallegt hljóðið í þessum V8 Ford Bronco Baja Monster. Bíllinn kemur á markað í Bandaríkjunum 2023 og er sérlega skemmtilega útbúinn og spennandi að sjá.
Hinn nýi Peugeot 408 verður sýndur 22. júní og opinberar kynningarmyndir staðfesta að sögn Auto Express að þetta verði...
Þá er komið að því: Opel hefur fengið samastað en Brimborg tók við umboðinu um áramót. Lítið hefur verið fjallað um breytingarnar á sölu Opel hér á landi en núna er allt að gerast. Fyrstu bílarnir koma í mars.
Þegar við sjáum sölu nýrra bíla dragast hratt saman í Evrópu vegna kóvid-19 faraldursins sér Volkswagen Group fram á...