Aftur til fortíðar
Við hjá Bílabloggi heimsóttum samgöngusafnið að Stóragerði í Skagafirði fyrir skömmu [2020]. Þar hittum við fyrir staðarhaldara og spurðum þá nokkurra spurninga um safnið og tilurð þess.
Land Rover var vinsæll í sveitum landsins. Einn á hverjum bæ nauðsyn!
Gunnar Kr. Þórðarson stofnaði þetta safn ásamt eiginkonu sinni Sólveigu Jónasdóttur þann 26. júní árið 2004. Gunnar var menntaður bifvélavirkjameistari og Sólveig er grunnskólakennari.
Gunnar var með brennandi áhuga á samgönguminjum og frá unga aldri safnaði hann sjálfur stórum hluta sýningargripanna. Gunnar gerði upp bæði bíla og vélar en til að varðveislan væri sem best þurfti að byggja skemmu og var því lítið annað í stöðunni en að opna þetta glæsilega safn fyrir gesti og gangandi. Fyrst var safnið um 600 fm salur með lítilli gestamóttöku.
Fyrir utan safnið og í kringum það má svo áætla að séu í kringum 200-250 bílar og tæki í misgóðu ásigkomulagi sem ótrúlega gaman er að skoða. Verkstæði safnsins stendur sunnan við safnið og er öll uppgerð á bílum og tækjum unnin þar.
Á útisvæði og í sýningarsölum eru auðvelt að gleyma stað og stund. Safnið er sérlega vel upp sett og gefur góða innsýn í samgöngusögu íslendinga.
Á útisvæði má sjá gömul tæki sem muna mega sinn fífil fegri en mörg þeirra eiga eflaust eftir að ganga í endurnýjun lífdaga. Gaman er að sjá hversu margir bílar sem nýkomnir eru á fornbílaaldur eru á safninu.
Á Moscovitch kemstu það (úr auglýsingatexta)
Bifreiðar og Landbúnaðarvélar fluttu þessa bíla inn frá Sovétríkjunum. Þessi Moskvitch árgerð 1979 var notaður til að ferja fiskikör á Ólafsfirði. Upphaflega komu þessir bílar með húsi en það hefur verið tekið af þessum til að hann nýttist betur við flutninga. Bíllinn kom á Samgöngusafnið í Skagafirði árið 2007.
„Kaupið Ford, hann hentar íslenskum staðháttum“ (úr auglýsingatexta)
Sveinn Egilsson var með umboðið fyrir Ford bíla á þessum árum. A 1773 er Ford Taunus 1.6, skutbíll árgerð 1981. Þessi bíll er fyrst skráður árið 1982 á Akureyri og er í eigu Magnúsar Friðrikssonar í fjögur ár. Hann selur svo bílinn til Stefáns Vilhjálmssonar sem átti og notaði bílinn í 20 ár. Upphaflegt skráningarnúmer var A 95.
„Allt á sama stað“ (úr auglýsingatexta)
Egill Vilhjálmsson hf, flutti inn Jeep bílana frá árinu 1967. Þennan Willis Jeepster keypti Garðar Hallgrímsson svæfingalæknir nýjan árið 1967. Eftir hans dag eignaðist sonur hans, Steingrímur Garðarsson bílinn og var byrjaður að gera hann upp en sá fram að hann myndi ekki ná að ljúka verkinu. Safnið eignaðist bílinn 3. ágúst 2008. Uppgerð bílsins var lokið veturinn 2012 – 2013 á verkstæði safnsins. Þá sprautaði Páll Magnússon bílinn. Þessi bíll er aðeins ekinn 25.596 km.
Það var hinn 11. Júlí 1969 sem Bókabíllinn var tekinn í notkun. Þessum bíl man undirritaður vel eftir og nýtti þjónustu hans. Ófáar ferðir voru farnar í bílinn og bækur fengnar að láni. Tinnabækurnar, Frank og Jói ásamt fleirum voru vinsælar á þeim tíma. Bílinn var byggður upp úr gömlum strætisvagni sem hafði ekið um götur borgarinnar í ellefu ár áður en honum var breytt í bókabíl.
Smíði innréttinga í bílinn var afar vönduð og þær eru í fínu lagi enn í dag. Bókabíllinn var búinn sjálfstæðu rafkerfi sem keyrt var á rafgeymum sem hlaðnir voru á nóttunni. Þannig var ávallt flott lýsing í bílnum þegar maður kom að skoða bækur. Einnig var sjálfvirk olíukynding á vatnskerfi bílsins sem hélt á gestum hita á köldum vetrardögum.
Rafmagnsteikningar og hönnun gerði Jóhann Indriðason verkfræðingur, Þórarinn Gunnarsson bifreiðasmiður sá um hönnun og smíði kyndikerfis ásamt því að hanna allar innréttingar í bílinn. Torfi Jónsson auglýsingateiknari sá síðan um ytra útlit, litaval og frágang á myndum.
Við látum myndirnar tala sínu máli…og mælum með heimsókn á safnið
Sjúkrabíll sem notaður var á Skagafjarðarsvæðinu. Var í umsjá björgunarsveitarinnar á Hofsósi og kom á safnið árið 2006.
Grunnurinn er Toyta Corolla en flest annað er dót sem kom á starfsstöð Gámaþjónustunnar. Því mætti segja að bíllinn sé að einhverju leyti endurunninn.
Gamli gráni frá Flugmálastjórn og var síðast notaður á Vopnafirði kom á safnið í kringum 2003. Var notaður af Flugmálastjórn í Reykjavík fyrst og var þá grár.
Mercedes Benz rúta: Rútuna flutti Alli Rúts inn – kom á safnið fyrir 2 árum í gegnum hann.
Thunderbird fluttur inn af bandarískum hermanni af herstöðinni á Keflavíkurflugvelli. Bíllinn var upphaflega svartur en var málaður í Reykjavík í þeim lit sem á honum er í dag.
Skoda Octavia kom austan af Vatnsnesi fyrir um 10 árum. Líklega árgerð 1959 eða 1960. Þegar safnið fékk bílinn fóru menn og sóttu hann út á Vatnsnes. Þá var bíllinn inni í skúr á keðjum og frá honum gengið eins og hann hefði verið nýkominn úr bíltúr.
Hér gætu eflaust einhverjir Vestmannaeyingar rifjað upp afskipti sín af lögreglu því þessi bíll kemur úr umdæmi lögreglunnar í Eyjum. Bíllinn kom á safnið í vor og er í fínu standi.
Myndband og klipping: Dagur Jóhannsson.
Ath. Greinin birtist fyrst í júlí 2020.
Aðrar umfjallanir
Fiat hefur í gegnum tíðina smíðað marga ansi skemmtilega bíla. Ummæli Oliver Francois, forstjóra Fiat hafa birst í nokkrum...
Volvo Cars hverfur frá dísilknúinni fortíð sinni og heldur inn í rafmagnaða framtíð, að því að fram kemur í frétt á Automotive News Europe í dag...
Það er nokkuð ljóst að hæfileikar Elons Musk liggja víða en þó ekki á danssviðinu. Í það minnsta hefur hann ekki lært sporin á dansgólfinu hjá Heiðari heitnum Ástvaldssyni sem kenndi dans á Íslandi í hálfa öld.
Þetta verður nú eitthvað! Kia EV6 GT er sportútgáfa af hinum frábærlega vel heppnaða rafbíl, EV6. GT-bíllinn er 576 hestöfl og hröðunin er nú alveg þokkaleg, eða innan við 3.5 sekúndur úr kyrrstöðu upp í 100 km/klst. Það er nú miklu meira en þokkalegt!