Kaup á fornbíl

Áður en hugað er að kaupum á fornbíl þarf að skoða nokkur atriði. Númer 1, 2 og 3 er að hafa húsnæði fyrir bílinn, hvort sem það er bílskúr, pláss í bílageymslu eða hjá klúbbastarfsemi sem viðkomandi vill ganga í. Þetta er aðalatriðið sem þarf að huga að, því gamlir bílar þola einfaldlega ekki íslenskt veðurfar yfir vetrarmánuðina og ryðga niður ef þeir eru látnir standa úti.

Svo er það ástand bílsins. Betra er að kaupa bíl sem er lítið ryðgaður og þarf ekki að fara í mikla uppgerð, þó hann kosti meira. Að gera upp bíl er nefnilega meiriháttar mál. Til þess þarf mjög góða aðstöðu, mikið skipulag, góðan tíma, þolinmæði,  fjármagn og síðast en ekki síst verkkunnáttu. Því getur hreinlega verið ódýrara að kaupa bíl í góðu ástandi en að fá gefins ónýtan bíl.

Einnig er gott að huga að hvernig aðgengi er að varahlutum erlendis, hveru sjaldgæfur bíllinn er og hvað menn eru tilbúnir að borga fyrir varahlutina og hvort þeir  séu einfaldlega til. Það er í flestum tilfellum auðvelt að fá varahluti í ameríska bíla, þar sem mikið var framleitt af þeim og markaðurinn er stór fyrir þá. Að fá varahluti í evrópska bíla er mismunandi eftir tegundum. Þýskir bílar eru auðveldir viðfangs en verðmiðinn er yfirleitt hár. Sóvéskir bílar eru hins vegar allt annar handleggur, því það getur verið erfitt að finna örugga vefsíðu sem hægt er að treysta, en takist það þá er verðið yfirleitt hagstætt. Ekki hef ég þekkingu á japönskum bílum, en þeir haga þann kost að bila minna en hinir og eru auk þess ungir í samanburði við aðra áhugaverða fornbíla.

Ef aðstæður bjóða ekki uppá það er flott að fá bifvélavirkja með að skoða bílinn og er þá nauðsynlegt að þekkja hann vel og treysta skoðunum hans. Þá verður hann að geta lagt mat á ástand bílsins og mögulega kostnað sem því fylgir að fá hann í það form sem óskað er.

Viðhald

Viðhald á bílnum krefst einfaldlega meiri vinnu og skynsemi en varðandi nýrri brúksbíla. Mun örar þarf að skoða smurolíu, kælivatn og aðrar olíur en gengur og gerist, því gamlir bílar leka þeim eða brenna meira en flestir aðrir bílar. Einnig þarf að muna að setja koppafeiti í legur bílsins og smurkoppa.

Ég hvet alla fornbílaeigendur sem eru á eldri bíl en árgerð 1988 að fá sér steðjanúmer (svörtu gömlu númeraplöturnar). Það fer öllum fornbílum betur að mínu mati og passar við tíðaranda bílsins.

Gjöld sem vert er að vita um

Það getur verið ódýrara að eiga fornbíl en menn halda. Ef ætlunin er að flytja inn fornbíl erlendis frá er gott að vita að það er einungis 13% tollur af innfluttum bílum sem eru eldri en 40 ára sama hver vélarstærð hans eða mengunarstuðull er. Skoðun á bílum eldri en 25 ára fer fram annað hvert ár og tekur skoðun bílsins mið af þeim reglum sem voru þegar bíllinn var framleiddur.

Hins vegar mæli ég eindregið með því að fornbílaeigendur setji tveggja punkta öryggisbelti í fornbíla sína, lík þeim sem eru í flugvélum, en þau geta bjargað lífi eigandans og farþega hans ef þeir lenda í alvarlegu umferðaróhappi.

Vetrargeymsla

Þegar líða fer að vetri þarf að huga að geymslu bílsins og hvernig er best er að undirbúa hann fyrir vetrardvalann. Best er að koma fyrir höfuðrofa í bílnum þannig auðvelt sé að taka rafmagnið af honum og ennþá betra er að eiga hleðslutæki sem viðheldur hleðslu geymisins. Þeir rafgeymar sem eru stöðugt í svoleiðis hleðslu geta enst í meira en 10 ár. Að öðrum kosti eru líkur á að geymirinn botnfalli og eyðileggist.

Ef aðgegni að bílnum er gott á meðan á vetrardvölini stendur t.d. í bílskúr eigandans, er mjög sniðugt að setjast regluleg inní bílinn og stíga nokkrum sinnum á bremsurnar til að halda þeim liðugum. Hins vegar er ekki sniðugt að ræsa kaldar vélar í tíma og ótíma. Yfirbreiðsla er einnig sniðug til að hlífa lakki bílsins og gott er að hafa einhverskonar mottu undir honum sem tekur við olíunni sem lekur af bílnum. Eldri fornbíll sem lekur ekki er einfaldlega olíulaus, því allar pakkningar þorna í vetrargeymslunni og þá byrjar lekinn.

Þegar fer að vora

Þegar vetrardvölini er lokið er mikilvægt að skoða hvort allur vökvi og olía sé til staðar á bílnum. Áður en sjálfskiptur fornbíll er tekinn í notkun getur verið gott að ýta honum út úr bílskúrnum, setja hann í gang og láta hann hitna áður en olían á sjálfskiptingunni er mæld og sett á. Einnig er sniðugt bæta fljótlega eldsneyti á bíllinn því það getur dofnað í vetrargeymslunni.

Lokaorð

Þessi grein er skrifuð út frá reynslu höfundar og eflaust eiga einhver atriði hennar ekki við um alla fornbíla. Þó er gott að miðla henni, því reynslan er alltaf ólygnust.