Hún er komin! Fjórða sería þáttanna Drive to Survive er nú aðgengileg á Netflix. Fyrir þá sem ekki þekkja til þá eru þetta þættir um Formúlu 1 og það sem gerist „á bak við tjöldin“.
Hádramatískt „stöff“ svo ekki sé fastar að orði kveðið!
Þættirnir eru 10 í hverri seríu og hafa þeir eflaust átt þátt í að vekja áhuga ólíklegasta fólks á Formúlu 1. Í það minnsta hafa þeir notið gríðarlegra vinsælda og hefur verið talað um „formúluæði“ hér á landi og víðar.
Hvernig sem raunveruleika eða óraunveruleika er háttað þá kynnast áhorfendur býsna áhugaverðum persónum og öðrum minna áhugaverðum. Sumum hrútleiðinlegum og öðrum sem eru svo skemmtilegar að mann langar að bjóða þeim í næsta afmæli!
Yfirbragð raunveruleikasjónvarps
Það má segja að Drive to Survive hafi frá upphafi, en mismikið þó, haft á sér blæ eða yfirbragð raunveruleikaþátta sem einhvern tíma voru aðalmálið.
Drama, spenna, svik, prettir, græðgi, öfund, gleði, baktal, vinátta, fjandskapur… já, þetta er allt þarna. En eru þetta raunveruleikaþættir eða eitt stórt og feitt handrit? Það er nú það.
Dæmi hver fyrir sig en sjálf hef ég gleypt fyrri þáttaraðir í mig og mun sporðrenna þessari líka, en þó ekki í einum munnbita. Mæli með Drive to Survive – hvort sem fólk er með bíladellu eður ei. Góða skemmtun!
Aðrar umfjallanir
Þessi franski langferðabíll var býsna heitt farartæki, enda eins konar gróðurhús á hjólum. Þegar farþegar voru orðnir sjóðandi heitir og kjarnhiti á við nokkuð temmilegt „roast beef“ var langferðaofninum breytt aðeins. Enda eru ofeldaðir ferðalangar ekki góðir.
Niðurstöðurnar liggja fyrir vegna árlegra verðlauna Parkers New Car Awards 2021 og sendibílar frá Brimborg hlutu fyrstu verðlaun fyrir Sendibíl ársins...
Ný og gjörbreytt kynslóð hins vinsæla Renault Megane er væntanleg til BL í júní og eru forpantanir þegar hafnar. Ekki aðeins hefur Megane verið endurhannaður frá grunni...
Undanfarinn áratug höfðu umhverfissinar séð svart af vanþóknun vegna hins bensínþyrsta risavaxna Hummer jeppa. Núna lítur hins vegar annar...