Hvernig gírkassar eru í rafbílum?

Af því Íslendingar eru í stuði og spenntir fyrir rafbílum (afsakið aulahúmorinn en ég gat ekki látið þetta tækifæri renna mér úr greipum) um þessar mundir þá er ekki úr vegi að velta þessari spurningu fyrir sér.

Brunamótorar þurfa gírkassa því að á tiltölulega litlu snúningssviði framleiða þeir hámarks tog og/eða afl. Það er hægt að drepa á brunavél fyrir slysni eins og væntanlega allir þekkja og það er líka ástæðan fyrir því að það er alltaf einhver gerð af gírkassa í þeim. Þeir þurfa að geta gengið hægagang og þurfa þess vegna hlutlausan gír og kúplingu/tengsli af einhverju tagi.

Rafmótorar eru ekki með sérstakan hagvæmasta snúningshraða, þeir gefa tog og afl út allt snúnigssviðið sem getur verið eins og áður segir 0 til 20.000 sn/mín jafnvel hærra. En brunavélar hafa oftast hámarks snúningshraða á bilinu 4.000 til 6.500 sn/mín, stundum eitthvað meira en það er ekki algengt í fólksbílum.

Samkvæmt mínu slæma minni þá las ég að Tesla hafi í einhverjum tilfellum notað tvo rafmótora þar sem annar er notaður til að taka af stað og svo tekur hinn við þegar bíllinn er kominn á meiri hraða, báðir hafa einn gír en gírhlutföllin eru mismunandi.

[Birtist fyrst í apríl 2020]