Eitursnjall og fagur

Það vantar ekki að Frakkar kunna að hanna fallega bíla. Það á sannarlega við um Renault Clio og frá því hann „endurfæddist“ útlitslega árið 2012 (Clio IV) þá hefur mér þótt hann með eindæmum fagur á að líta. Litaúrvalið er líka virkilega skemmtilegt.

Nú er kominn á markað Clio V, fimmta kynslóðin og má framleiðandinn eiga það að mikill og góður búnaður er í bílnum og verður vikið nánar af því hér síðar.

Rými sem nýtist vel

Það var ljómandi gott að aka bílnum. Hann er lipur og vel fór um ökumann og farþega í framsæti. Ég klikkaði alveg á að setjast aftur í bílinn þannig að fátt er um rýmið þar að segja. Það leit í það minnsta út fyrir að rúma vel tvo krakka, jafnvel þrjá ef þeir eru af smærri gerðinni.

Snjallbíll fyrir allan peninginn

Í heimi þar sem flestir eiga snjallsíma og snjallúr er ekki annað hægt en að fagna snjallbílum. Renault Clio er heldur betur snjall! Í fyrsta lagi tekur bíllinn manni fagnandi, nánast eins og hann sé gæludýr, þegar maður gengur að honum. Ljósin kvikna og speglarnir fara í rétta stöðu án þess að maður geri neitt. Það eina sem þarf er að vera með fjarstýringuna í veskinu eða vasanum og þá er bíllinn tilbúinn til brúks. Einn takki til að ræsa græjuna og svo af stað.

Hljóðkerfið í Clio er einstaklega gott. Það er sérhannað af BOSE og Renault og samanstendur af átta hátölurum og bassahátalara sem nefnist Fresh Air. Ekki veit ég hvað nafnið á að fyrirstilla en það var virkilega frískandi að hlusta á tónlist í þessum líka fínu græjum.

Lítið um píp og baul

Mörgum okkar þykir óþolandi þegar endalaus baul og píp heyrast frá mælaborði; útihitastigið er lægra en fjórar gráður, akreinavarinn er virkur, þú ert að bakka bifreiðinni, bensínið er að klárast, mamma þín er að hringja, o.s.frv. Stöðugt áreiti sem fer í taugarnar á manni. Þetta er sko ekki í Clio! Hann lætur mann vita af því sem þarf að berast með titringi í stýrinu og má stilla styrk titringsins.

Verð, eyðsla og samantekt

Bíllinn eyddi að meðaltali 6 lítrum á hundraðið í bíltúrnum mínum og er það vel. Það er hægt að stilla bílinn á umhverfisvænni stillingu sem aðeins var prófuð stutt og því ekki marktækt hvernig eyðslan væri í þeirri stillingu.

Í heildina litið var mikil tækniupplifun að prófa þennan nýja Clio og ljóst að mikið Frakkarnir hafa sett mikið púður í hönnunina. Útkoman er í það minnsta góð og býst ég við að eigendur slíkrar sjálfrennireiðar fái ekki fljótt leið á henni því það virðast endalausir möguleikar, t.d. í gegnum EASY LINK og MY Renault. Svona eins og spennandi takkabretti fyrir takkaóða!

Myndir innan úr Clio: Renault