Fjórða kynslóð Kia Sorento
Allt frá því að Kia Sorento var kynntur til sögunnar árið 2002 hefur bíllinn notið mikilla vinsælda hér á landi. Um 3000 nýir Kia Sorento bílar hafa verið seldir hér á landi frá því að þeir komu fyrst.
Það er því óhætt að segja að þessi gerð bílsins hafi lagst vel í landann í gegnum árin. Það verður þó að taka inn í myndina að Kia var nýtt bílamerki á hér á Íslandi og var að stíga sín fyrstu skref með alvöru bíla.
Þessi árangur Kia hér á landi verður því að teljast nokkuð góður.
Nýr Kia Sorento heldur hefðbundnu jeppalaginu sem hrífur marga.
Vinsæll jeppi meðal landans
Nú lítur fjórða kynslóð þessa vinsæla jeppa dagsins ljós og var bíllinn frumsýndur nú í dag (21.10.20) hjá Kia umboðinu á Íslandi og var kynningunni streymt á Facebook.
Bíllinn kemur í fjölmörgum útfærslum.
Ótrúlega vel búinn
Við reynsluókum bílnum á dögunum og fengum afhentan einn splunkunýjan af Luxury Plus gerð. Grunngerð Kia Sorento er annars mjög vel búin og kemur með öllu því helsta sem kaupendur vilja sjá í nýjum bílum í dag. Þar má nefna blindblettavari, bakkmyndavél, rafdrifið bílstjórasæti, hiti í fram- og aftursætum, skynvænn hámarkshraðavari (les umferðarskilti), skynvæddur hraðastillir sem heldur jöfnu bili milli þín og bílsins fyrir framan.
Þráðlaus hleðsla fyrir farsíma, upphitað stýri, regnskynjari, stop and go kerfi sem er partur af skynvædda hraðastillinum þannig að bíllinn stöðvar þegar bifreiðin fyrir framan stöðvar og tekur af stað aftur þegar umferð tekur af stað til dæmis á ljósum. Fjarlægðarskynjarar að framan og aftan.
Grillið hefur tekið breytingum frá fyrri gerð og svipurinn er sterklegur.
Snjall búnaður
Dýrari gerðirnar eru síðan með örlítið meiri búnaði eins og leðursætum, hljómkerfi frá Bose með 12 hátölurum, blindbletta myndavél í mælaborðinu sem sýnir útsýni úr hliðarspeglum, hliðar árekstrarvörn og í Luxury Plus gerðinni er panorama glerþak og LED inniljós. GT-Line bíllinn er síðan með Nappa leðuráklæði, 20 tommu álfelgum, stigbretti, kælingu í framsætum og upplýsingavörpun á framrúðu.
Rúsínan í pylsuendanum varðandi GT-Line bílinn er að þú getur fjarstýrt bílnum. Þú stendur fyrir framann bílinn og leggur honum í stæði með því að smella á hnapp á lyklinum – og kallar á hann út úr stæði með sama hætti.
Þetta er bráðsnjallt þar sem lítið pláss er og þú vilt vera viss um að bílnum sé vel lagt.
Fágaður og fallegur afturendi. Takið eftir afturljósunum - er ef til vill smá Mustang svipur þarna?
Plássmikill
Og þá að reynsluakstrinum sjálfum. Þessi nýi Kia Sorento er að öllu leyti glæsilegur bíll. Það fer ákaflega vel um mann í vel formuðum sætum, gott fótapláss er frammí þó svo að miðjustokkurinn sé ef til vill fullstór.
Hurðir opnast sérlega vel, bæði fram og afturhurðir og þú sest beint inn í bílinn en ekki niður í hann. Hægt er að hækka sætisstöðuna frammí það mikið að þú sérð mjög vel yfir mælaborðið og út yfir húddið. Efnisval og áklæði er til fyrirmyndar.
Kia Sorento er rúmgóður og efnisval er allt hið besta í bílnum.
Þægilegt aðgengi
Afturí er flennipláss og framsætin sitja það hátt frá gólfi að hægt er að hvíla fætur undir þeim. Að auki eru aftursætin á sleðum og hægt að færa fram og aftur. Einnig er hægt að halla aftursætunum. Þá er mögulegt að stilla hita í aftursætum.
Kia Sorento er fullvaxinn jeppi, stór bíll með miklu plássi. Farangursgeymslan er rúmlega 600 lítrar og stækkanleg með því að fella sætin niður. Með þriðju sætaröðina í notkun (7 sæta útfærsla) erum við að tala um 187 lítra farangursrými. Afturhlerinn er rafdrifinn og gerir þannig alla umgengni um farangursýmið mun þægilegri.
Hurðir opnast sérlega vel og gott er að ganga um bílinn.
Gleði og ánægja
Hin sanna ánægja hefst þegar við setjumst undir stýri og ökum af stað. Mýkt, stöðugleiki og afl eru þau atriði sem koma upp í hugann þegar ekið er af stað. Bíllinn er afar hljóðlátur þrátt fyrir öfluga dísel vélina. Kia Sorento er þéttur og stinnur án þess að vera hastur.
Nákvæmt rafmagnsstýrið svarar um leið og maður á við það og það verður í raun afslappandi að aka bílnum þrátt fyrir að vera í þungri umferð.
Farangursgeymslunni mætti líkja við pláss í litlum sendibíl en bíllinn er boðinn í sjö sæta útgáfu.
Aftasta sætaröðin fellur niður í gólfið og gólfið fellur slétt við hlerakarminn.
Eftirsóttur dísel bíll
Kia Sorento er boðinn með 2.2. lítra, 4 strokka díselvél sem gefur um 202 hestöfl við 3800 snúninga. Togkrafturinn er um 440 Nm við 1750-2750 snúninga á mínútu. Miðað við ofangreint finnur maður vel fyrir krafti vélarinnar og við fundum aldrei að bílnum vantaði afl – allavega ekki í borgarumferðinni. Kia Sorento er með 8 þrepa sjálfskiptingu og svokallaðri Wet-Clutch kúplingu.
Um er að ræða vökvabúnað sem er inni í sjálfskiptingunni sem gerir aksturinn enn mýkri, sparar eldsneyti og minnkar viðhald.
Mælaborðið er nýtískulegt og stafrænt og allt við hendina.
Góð reynsla
Reynslan á Kia hefur í gegnum tíðina verið góð hér á landi. Notendahópurinn er fjölbreyttur og bílar þessarar tegundar vinsælli með hverju árinu sem líður. Það er því næsta öruggt að þessi bíll á eftir að sjást víða á vegum landsins, bæði í þéttbýli og strjálbýli.
Luxury Plus bíllinn kemur með leðuráklæði á sætum.
Hentar mörgum
Dráttargeta bílsins er um 2.5 tonn og gæti þessi bíll því nýst fólki í hestum og mótorsporti ágætlega. Sem aðalbíll á heimili til bæjarsnatts eða til lengri ferðalaga er Kia Sorento án efa mjög hagkvæmur og góður kostur.
Hann er lipur og þægilegur í bæjarakstri og eyðir litlu eldsneyti eða rétt um 6 lítrum á hundraðið í blönduðum akstri. Það er stór hópur bílnotenda sem vilja áfram dísel bíla enda mjög hagkvæmir í rekstri, sérlega fyrir þá sem búa í strjálbýli.
Sólargardínur í afturgluggum.
Fjölbreytt framboð
Kia Sorento er einnig boðinn með 1.6 lítra bensínvél í GT-Line og HEV (Hybrid) útgáfu. Ekki liggur alveg fyrir hvenær Kia Sorento kemur í PHEV (Plug-in hybrid) útgáfu en samkvæmt upplýsingum frá Kia á Íslandi ætti það að vera fljólega á nýju ári.
LED ljósabúnaður.
Helstu tölur:
Verð frá 9.290.777 þús. kr. Verð á reynsluakstursbíl 10.390.777 þús. kr.
Vél: 2.2 lítra, 4 strokka, dísel – 202 hestöfl.
Tog: 440/1750-2750 Nm/rpm.
Dráttargeta: 2500 kg.
CO2: 158 g/km.
Eigin þyngd: 1819-1954 kg.
L/B/H 4810/1695/1900 mm.
Eyðsla bl ak: 6 l/100km.
Útfærsla | Drif | Vél | Girkassi | Eldsneyti | Tog-Hö. | VERÐ FRÁ. | |
---|---|---|---|---|---|---|---|
7 manna Style
| Fjórhjóladrif | 2.2L | Sjálfskipting. DCT 8 | Dísel | 440 - 202 | ||
7 manna Luxury
| Fjórhjóladrif | 2.2L | Sjálfskipting. DCT 8 | Dísel | 440 - 202 | ||
7 manna GT-Line
| Fjórhjóladrif | 2.2L | Sjálfskipting. DCT 8 | Dísel | 440 - 202 |
Aðrar umfjallanir
Nú hefur Mazda komið sínum fyrsta rafbíl á markaðinn. Hann heitir MX-30 og er aðeins öðruvísi bíll. Við fyrstu sýn dettur manni í hug afkvæmi CX-3 og Mazda 3 með aftari...
Ég held að það sé ekki erfitt að búa til bíla. Passaðu að hann sé með fjögur hjól, eitt stýri, þægilegt sæti og hafi útlitið...
Það er óneitanlega vor í lofti þessa dagana. Síðasta laugardag skruppum við félagarnir (Gulli og Pétur) í skemmtilegan reynsluakstur á nýkomnum Peugeot 3008...
Það var einn góðviðrisdag í ágúst að við skelltum okkur í bílferð nokkrir félagar hjá Bílablogg.is. Farskjótinn var ekki af verri endanum, splunkunýr Grand Cherokee Trailhawk með 35 tommu breytingu frá Arctic Trucks.