Vel búinn Hyundai i20

Veðrið var gott þennan bjarta laugardag. Við tókum rúntinn á glænýjum Hyundai i20, ókum út úr Kauptúni áleiðis út á Reykjanesið. Það fyrsta sem maður hugsaði! “Það er bara allt í þessum sportlega smábíl.” Hyndai i20 er í sama flokki og til dæmis Kia Rio, Volkswagen Polo, Ford Fiesta og Renault Clio.

Smærri vél – meiri orka

Þriggja strokka 100 hestfla túrbó GDI vélin stóð sig eins og hetja og nægir bílnum fyllilega. Hljóðlát, snörp og vinnur vel með 7 þrepa, tveggja kúplinga sjálfskiptingunni. Eflaust er bíllinn enn snarpari með 5 gíra beinskiptingu. Eyðslutölur eru heldur ekki að skemma fyrir en uppgefin eyðsla er rúmlega 5 lítrar á hundraðið og gæti þá verið við venjulegar aðstæður um 6 til 6.5 lítrar í blönduðum akstri.

Eitthvað sem skiptir ekki öllu máli í venjulegum borgarakstri en skorar talsvert hátt í langferðum. Annars er allur aðbúnaður í bílnum til fyrirmyndar, gott pláss fyrir fætur frammí og þrælgott aftursæti sem rúmar þrjá fullorðna án vandræða. Höfuðpláss fyrir aftursætisfarþega kom einnig vel út.

Nóg pláss

Bílinn er svokallaður hlaðbakur (e. hatchbak) og farangursrýmið því ekkert sérlega stórt – samt rúmar það 326 lítra sem gæti alveg yfirfærst á lítið golfsett. Aftursæti eru niðurfellanlega í hlutföllunum 60:40 þannig að þá erum við komin í rúma 1040 lítra sem væri þá annað og aðeins stærra golfsett.

Hyundai framleiðir fallega bíla og i20 er þar engin undantekning. Búnaður bílsins er þó það sem við tókum sérstaklega eftir. Hyundai i20 er búinn Smart Sence akstursaðstoðarkerfi sem gerir akstur bílsins enn öruggari. Ratsjá og myndavél skynja til dæmis ef bíll hemlar snögglega fyrir framan bílinn og beitir þá sjálfur hemlakerfi bílsins.

Snjalltækni

Hyundai i20 er búinn fullkomnu margmiðlunarkerfi sem aðgengilegt er í gegnum 7 tommu snertiskjá í mælaborði.

Þær gerðir sem í boði eru hjá Hyundai á Íslandi eru Classic útgáfan sem er sú ódýrasta og með minnstum búnaði og vél, þá Comfort og síðan Style bíllinn sem er sá með mestum búnaði. Einnig er í boði Premium útgáfa. Hægt er að velja um 10 liti þar sem sami litur er á öllum bílnum og 7 tvítóna samsetningar þar sem annar litur er á þaki en búk. Mismunandi búnaður er í bílunum eftir því hvaða gerð um ræðir, Classic, Comfort, Style eða Premium.

Kominn á 16 tommu álfelgur og í bláum eða rauðum boddý lit með svörtu þaki er bíllinn verulega snotur og sportlegur.

Helstu tölur:

Verð frá: 2.590 þús. (Verð á reynsluakstursbíl 3.350 þús. – maí 2020)

Vél: 999 rms.

Hestöfl: 100 hö.

0-100 k á klst: 10.5 sek.

Hámarkshraði: 190 km.

CO2: 112-118 g/km.

Eigin þyngd: 1250 kg.