Fjölskyldu „kappaksturs” bíll
Tesla Model 3 er einn vinsælasti bíll á Íslandi í dag. Það er svo sem ekkert að undra. Bíllinn er að mörgu leyti langt á undan samkeppnisaðilum í rafbílageiranum þrátt fyrir að hann sé alls ekki gallalaus. Það eru reyndar fáir bílar þó.
Svört áferð á listum, myndavélum og hurðarhúnum fylgir uppfærslu árgerðar 2021.
Að aka um götur borgarinnar nú til dags þar sem Tesla Model 3 blasir við á hverju götuhorni minnir óneitanlega á þegar Bjallan var uppá sitt besta og annar hver bíll var af þeirri tegundinni.
Nú eða þegar „allir” óku á Fiat Uno eða Toyota Corolla. Nú er það Tesla Model 3 sem trónir ofarlega.
Nýjar felgur eru hluti af uppfærslu árgerðar.
Tæknilega framúrskarandi
Við hjá Bílablogginu fengum lánaða Teslu fyrir fáeinum dögum og nutum þess að aka um götur borgarinnar og út á Reykjanesskagann til að reynsluaka ökutækinu. Árgerð 2021 hefur reyndar fengið talsverða uppfærslu. Þar má helst nefna varmadælu sem nýtir hita rafhlöðunnar til upphitunar farþegarýmis bílsins.
Það sparar orku og bíllinn fer því lengra á hleðslunni.
Talandi um hleðslu, þá er Tesla Model 3 með um 75 kwst. rafhlöðu sem er svipað og í til dæmis VW ID.3 og ID.4. Hinn nýi Mustang Mach e, er sennilega helsti keppinautur Model 3 en uppgefin drægni skv. WLTP staðlinum ívið minni.
Flottar línur.
Léttar og liprar árgerðar breytingar
Önnur breyting sem ber að nefna frá fyrri árgerð er að „píanó” glansandi miðjustokkurinn er það ekki lengur – sem betur fer fækkar þannig fingraförum sem klístrast óneitanlega við svona glansandi fleti. Rétt undir mælaborðinu er síðan plussklædd þráðlaus hleðsludokka fyrir tvo alvöru snjallsíma.
Hér má sjá hleðsludokkuna sem tekur tvo fullvaxna snjallsíma.
Við erum að tala um nýjar 19 tommu felgur, nýjar 20 tommu Performance felgur úr léttari málmi, svarta áferð á listum í kringum glugga og svarta umgjörð um myndavélar á frambrettum. Skotthleri er kominn með rafdrifna opnun/lokun og hliðarrúður að framan eru úr tvöföldu gleri sem dregur töluvert úr hljóðmengun.
Ljómandi pláss afturí - fótapláss ágætt og höfuðpláss einnig.
Of mikið afl?
Það er ekki nema von að maður spyrji því bíllinn er innan við 5 sekúndur í 100 km/klst. Nú má reyndar hvergi aka hraðar en á 90 km/klst. á Íslandi svo þetta er kostur sem nýtist lítið hér á íslenskum vegum. Hvers vegna finna verkfræðingar Tesla ekki leið til að beisla þetta afl í rafhlöðuorku í stað þessa ógurlega upptaks?
Isofix barnabílstólsfestingar afturí og í farþegasæti frammí.
Afturhlerinn er nú rafdrifinn og opnast/lokast á skjánum eða með appinu.
Eins og „go-kart”
Maður sest ansi mikið ofaní bílinn enda bara um „venjulegan” stallbak (sedan) bíl að ræða. Sætin eru frábær, halda vel við og auðvelt að stilla á alla vegu þannig að þau henti manni.
Tölvuskjárinn er kristaltær og nánast eins og maður sjái inní framtíðina í gegnum hann.
Allt sem skiptir máli er innan seilingar á skjánum, hraðinn blasir við manni, myndrænar upplýsingar í gegnum 360° radarkerfið sýna manni umferð í rauntíma fyrir framan, aftan og til hliðanna.
Hurðirnar eru léttar og opnast vel.
Afturhurðir opnast einnig vel en innstig er frekar lágt.
Við ætlum ekkert að ræða um hleðslu – um þann hluta geta áhugasamir lesið á öðrum vettvangi. Þó ber að nefna að Telsa Model 3 getur hlaðið allt að 250 kwst. á klukkustund í Tesla Supercharge hleðslustöðvanetinu sem verið er að setja upp í kringum landið. Þar skákar Teslunni enginn enn.
Farangursgeymslan er eins og rými í litlum sendibíl, 649 lítrar.
Gott verð
Tesla Model 3 hefur svo sannarlega hitt í mark. Tæknin er framúrskarandi sem þýðir að bíllinn skarar fram úr á ákveðnum sviðum t.d. eins og drægni, hleðsluhraða og afl. Enda Tesla mun frekar hugbúnaðarfyrirtæki en bílaframleiðandi – allavega í byrjun. Það sést reyndar á samsetningu bílsins, ef grannt er skoðað, því mismunandi bil eru á milli hurða og bretta ásamt því að framhurð stóð talsvert utar en afturhurð á reynsluakstursbílnum.
Þetta er reyndar sér-amerískt fyrirbæri og þykir bara flott og kaninn hefur kallað þetta „hand-made with pride” hér áður fyrr (ekki lengra síðan en 2005).
Skjárinn er 15 tommur og kristaltær.
Verðið er frá tæpum 5,9 milljónum en dýrasta gerðin er á um 7,5 milljónir en svo er að sjálfsögðu hægt að bæta allskyns skrauti á bílinn og við það fer verðið eðlilega upp.
Notagildi
Já, stóra spurningin. Tesla Model 3 hefur að okkar mati mjög gott notagildi. Þrátt fyrir sportlegt útlit er bíllinn mjög rúmgóður, gríðarstór farangursgeymsla með djúpu hólfi undir sem gæti hæglega rúmað litla ferðatösku eða kælibox í útileguna. Fjórir fullorðnir rúmast vel í bílnum.
Sportlegur Tesla Model 3.
Helstu tölur:
Verð frá 5.800.000 til 7.500.000 kr.
Rafhlaða: 75 kWh.
Drægni: 614 km.
Hestöfl: 450.
0-100 km á klst. 4,3 sek.
Farangursgeymsla: 649 ltr.
CO2: 0 g/km.
Þyngd: 1.884 kg.
L/B: 4693/2087
Útfærsla | Drif | Girkassi | Eldsneyti | Tog-Hö. | Stærð rafhlöðu | Drægni allt að | VERÐ FRÁ. | |
---|---|---|---|---|---|---|---|---|
Staðalbúnaður
| Afturhjóladrif | Sjálfskipting | Rafmagn | 420 - 325 | 60 kWh | 491 km | ||
Long Range
| Fjórhjóladrif | Sjálfskipting | Rafmagn | 493 - 441 | 82 kWh | 602 km | ||
Performance
| Fjórhjóladrif | Sjálfskipting | Rafmagn | 660 - 513 | 82 kWh | 547 km |
Aðrar umfjallanir
Það er við hæfi að hefja þessa umfjöllun um Jeep Renegade Trailhawk tengitvinnbílinn á miklu stuði. Bíllinn var nefnilega prófaður rétt áður en eldgos hófst og...
Það var árið 1959 sem að hinn upphaflegi Austin Mini kom fram á sjónarsviðið með sitt einstaka útlit sem setti sitt mark á sjöunda...
Citroen e-C4 er nýr og spennandi rafmagnsbíll. Svo spennandi að kaupendur bíða í biðröð eftir að fá hann afhentan...
Stórir pallbílar eru meðal mest seldu bíla á Bandaríkjamarkaði, og þótt horft sé á allan markaðinn. Með breyttu neyslumynstri hér á landi hefur hlutfall pallbíla...