Hann er bara svo hljóðlátur

BMW IX er frumraun fyrirtækisins í flokki rafdrifinna sportjeppa. Bíllinn er þéttur, flottur og afar hljóðlátur. IX er talsvert líkur Vison hugmyndabílnum sem kynntur var árið 2018. Nú er hann kominn og við hjá Bílabloggi fengum hann að láni einn kaldan vetrardag fyrir nokkrum dögum.

Nýtt og framandi útlit

BMW IX er stútfullur af tækni enda ekki við öðru að búast af einum fremsta bílaframleiðanda í heimi. Þessi bíll er enginn X5, það eru engir sérstakir sporteiginleikar sem koma upp í huga manns við fyrstu kynni. Fyrst þegar ég sá nýrnalaga grillið hugsaði ég með mér „þetta er andskotanum ljótara”.

Bíllinn samsvarar sér afar vel og demantslaga formið kemur vel út. Hann er hins vegar mjög nálægt bræðrum sínum X5 og X6 í stærð.

Það er langt á milli hjólanna, þetta er rafbíll – það þarf að vera dágott pláss fyrir rafhlöðuna. Hún er staðsett neðst í bílnum sem gerir hann stöðugri í akstri og hann liggur vel á vegi.

Sætin eru dásamleg. Þau eru svona eins og maður sitji í sófasetti á hjólum. Yfirleitt finnur maður ekki slíka tilfinningu í BMW. Þeir eru stífir, stinnir og gerðir til að gefa svolítið í.

Skemmtileg fjöðrun

Við vorum svo sem ekki það lengi með bílinn að við mynduðum við hann nein bræðrabönd en nægilega lengi til að átta okkur á að þessi bíll er aðeins öðruvísi en aðrir rafbílar á markaðnum.

Það hefur verið lagt talsvert í nýjungar á innanrýminu. Stór, breið sæti, djúp aftursæti og nóg af plássi fyrir alla farþega. Efnisval framúrstefnulegt og sumt endurvinnanlegt fyrir þá sem vilja vera „pro” í umhverfismálum.

Þrjár útgáfur

BMW IX kemur í þremur útgáfum sem eru til sölu hjá BL. Grunnútgáfan heitir xDrive40 Atelier. Millitýpan er svo Launch Edition og síðast en ekki síst er það dýrasta gerðin; xDrive50.

Ágæt drægni

Launch Edition, sá sem við prófuðum, kemur með 71 kWst. rafhlöðu. Hámarksdrægni er uppgefin skv. WLTP um 425 kílómetrar. Hámarksdrægni á til dæmis Mercedes EQC er um 400 kílómetrar skv. WLTP en Tesla X er með uppgefna um 560 kílómetra drægni.

Þess má geta að mælt er með að hlaða rafhlöður rafdrifinna bíla ekki meira en í 80%. Reikna má með um 20-25% afföllum í rafmagni yfir vetrartímann t.d. þar sem lofthiti er nálægt frostmarki.

Afþreyingarkerfið er alveg glæsilegt. 15 tommu panorama skjár byggður á nýjustu tækni BMW sem kölluð er iDrive8. Það er bara eitt orð yfir tæknistöffið: Það er æði.

Mæli með því að áhugasamir renni við hjá BMW á Sævarhöfðanum og taki bíltúr.

Þægindi sem kosta

Bíllinn er sérlega hentugur fyrir þá sem þurfa mikið pláss. Ríkulegt farangurspláss gerir bílinn að góðum kosti fyrir þá sem hafa í hyggju að ferðast um landið. Myndi kannski ekki taka hálendisvegina á honum. Að öðru leyti er þessi flotti bíll ekkert frábrugðinn öðrum rafmögnuðum jepplingum á markaðnum.

Þessi þægindi eru reyndar ekki ókeypis. Bíllinn kostar frá 11 milljónum sem er ansi drjúgt fyrir hinn venjulega vinnandi mann.

Auðvitað er það alltaf matsatriði og gera má ráð fyrir að talsvert stór markaður sé fyrir bíla í þessum verðflokki.

Helstu tölur:

Verð frá 10.990.000 kr. nóv. 2021.

Rafhlaða: 71-105.2 kWh.

Dráttargeta: 2.500 kg.

Drægni: 425-630 km.

Hæð undir lægsta punkt: 20.2 sm.

0-100 km á klst. 4.6-6.1 sek.

Farangursgeymsla: 1.750 lítrar að hámarki.

CO2: 0 g/km.

Þyngd: 2.365 kg.