10 ráð varðandi umhirðu bíla

• Hvert er leyndarmálið? Þrjú orð: viðhald, viðhald, viðhald.
• Reglubundin þjónusta skiptir máli

Þegar við kaupum nýjan bíl, fylgir honum nær undantekningarlaust notendahandbók, því miður hér á landi venjulega aðeins á ensku eða öðru tungumáli. Engar, eða litlar kröfur eru uppi um að þessar handbækur séu þýddar á íslensku. En það er líklega vegna þess að enginn, eða fáir lesa notendahandbókina. Þetta á alla vega við um þær niðurstöður sem þeir sem halda úti vefsíðum um bíla í löndunum í kring um okkur hafa komist að.

Reglubundnar þjónustuskoðanir umboða skipta máli

Nær öll bílaumboð setja upp kerfi þjónustuskoðana þegar keyptur er nýr bíll. Í flestum tilfellum eru þessar skoðanir settar þannig upp til að viðhalda ábyrgðarskilmálum viðkomandi bíls.

En hvað á að gera?

Að hverju þarf að gæta ef við viljum halda bílnum eins góðum og við getum, óháð reglubundnum skoðunum á umboðsverkstæði?

Viðhald; „trúarbrögð“ hjá sumum

Sumir bíleigendur fylgja hverju því sem bifreiðaframleiðandinn mælir með, fyrir þá eru það trúarbrögð. Í mörgum tilvikum eru þeir að skipta um vélarolíu, gírkassa og bremsuvökva oftar en krafist er. Þeir lesa handbókina frá forsíðu til enda, og fylgja öllum ráðum og fyrirmælum til fulls.

Tíu góð ráð

Hér fyrir neðan eru tíu viðhaldsráð til að láta vél, gírkassa og aðra dýra hluta bifreiðarinnar endast lengur. Mikilvægast er samt að fara með bílinn reglulega í þjónustu á smurstöð til að forðast háan viðgerðarkostnað.

1.

Athugið olíuna: Einfaldasta leiðin til að auka endingu bíls, og þá aðallega vélarinnar, er að viðhalda réttu magni af olíu í vélinni. Að auki á að skipta um olíu og síu með því millibili sem mælt er með í handbók eigandans, til dæmis á 5.000, 7.500 eða 10.000 kílómetra fresti. Olían er mikilvæg, því hún smyr vélarhlutana. Í öðru lagi er olían vökvi sem dreifir hita. Flestar bílvélar brenna aðeins olíu um leið og hún smyr vélina þannig að það þarf að bæta það upp þegar olíuhæðin lækkar.

Þú gætir eyðilagt vélina að lokum, eða brætt úr henni, sem þýðir að það verður að taka hana upp eða skipta um hana, og það er mjög dýrt.

2.

Barist gegn eðju og botnfalli: Það er mikill ókostur við stuttar ferðir, umferð þegar stöðugt er varið að stoppa og taka af stað aftur, svo og langar ferðir þegar mikið álag er á vélina; til dæmis við að draga eftirvagn.

Fylgið notendahandbókinni varðandi skipti á olíu og síum til að koma í veg fyrir þessa uppsöfnun á eðju eða olíuþykkni eða skiptið yfir í tilbúna smurolíu, sem er ekki byggð á jarðolíu, nokkuð sem mjög margir bílar nota í dag. Við munum koma fljótlega með grein hér sem tekur á þessum mun og skilgreiningum á vélarolíu. Margir flotar nota tilbúna olíu.

3.

Skipt um tímareim: Vél bílsins er annað hvort með tímareim samsetta úr gúmmíefnum eða tímakeðju. Reimin tengir sveifarásinn við kambásinn, sem er samstilltur við opnun og lokun ventla vélarinnar. Ef bíllinn er með tímareim skaltu fylgja ráðleggingum framleiðanda (í handbókinni eða frá söluaðila) til að ákvarða hvenær skipt er um reimina.

4.

Athugið vökva á vökvastýri: Eldri bifreiðar og nokkrar nýjar gerðir eru með stýrisdælu fyrir vökvastýrið, sem er smurt með vökva fyrir vökvastýri. Forðabúr dælunnar er með skrúfuðu loki sem hægt er að taka af, svo að hægt sé að athuga vökvahæðina. Ef dælan verður þurr getur hún skemmst eða eyðilagst og þá þarf að skipta um hana með tilheyrandi kostnaði.

5.

Skipt um sjálfskiptivökva: Að hafa rétt vökvamagn á sjálfskiptingu er mikilvægt vegna þess að það kælir gírkassann, smyr hreyfanlega hluti og „mýkir“ skiptingu á milli gíra. Hins vegar glatar vökvinn gæðunum með tímanum. Tíð stöðvun og akstur eða dráttur á eftirvagni styttir „líftíma“ sjálfskiptivökva. Við þessar aðstæður hækkar hitastig gírskiptingarinnar/sjálfskiptingar og setur álag á íhluti gírkassans og vökvann.

Athugaðu vökvahæðina þegar vélin er í gangi. Til að forðast bilun í sjálfskiptingu skal aðeins nota vökvann sem bílaframleiðandinn mælir með. Dæmi eru um að menn hafi blandað saman ólíkum sjálfskiptivökvum og skiptingin hafi hrunið á viku!

6.

Skipt um kælivökva og þeim gamla skolað út: Kælivökvi inniheldur ryðvörn sem brotnar niður með tímanum. Ryð og tæring getur byggst upp og skaðað vélina, stíflað vatnslásinn og skemmt vatnsdæluna. Sumir bílaframleiðendur mæla með útskiptingu á kælivökva á 50.000 km fresti, aðrir nefna lengra tímabil.

7.

Hemlavökvi athugaður– skipt um hemlavökva: Þegar litið er á annað borð undir vélarlokið til að athuga vökva er það góður tími til að athuga hæð á hemlavökva. Settu bílinn á sléttan flöt og skrúfaðu síðan lokið af forðabúri hemlavökva. Hæð hemlavökva ætti að vera á milli lágmarks- og hámarksmerkja í vökvaforðabúrinu. Notaðu ráðlagðan vökva bifreiðaframleiðandans og bættu við það í rétta hæð. Að skipta um bremsuvökva mun ekki auka endingu hemlakerfisins en það gæti bjargað lífi þínu. Bremsuvökvi sogar til sín vatn með tímanum sem safnast hefur saman í hemlakerfinu sem dregur úr hemlunarkrafti.

Ef of mikið vatn er í hemlavökvanum, myndar það hita sem aftur getur látið hemlavökvann/vatnið sjóða í lögninni og aukið hemlunarvegalengd bílsins.

8.

Viðhald á millikassa: Þetta getur verið mjög dýr viðgerð þegar hlutirnir fara úrskeiðis. Skipta þarf um olíu í millikassa á aldrifsbílum og fjórhjóladrifnum ökutækjum með tilteknu millibili. Fylgdu ráðleggingunum framleiðandans.

9.

Víxlið dekkjunum: Dekk eru dýr, svo þú vilt að þau endist. Í eigendahandbók segir til um hvenær ætti að víxla dekkjunum og athuga samstillingu. Jafn mikilvægt er að viðhalda réttum loftþrýstingi til að komast fleiri kílómetra á hverju dekki. Oftast er límmiði við hurð ökumanns sem sýnir hjólbarðaþrýsting fyrir fram- og afturdekk.

10.

Hafið hreina loftsíu fyrir vélina: Óhrein loftsía getur dregið úr kílómetrum á hvern lítra eldsneytis, skaðað afköst vélarinnar og stuðlað að meiri losun útblástursefna frá vélinni.

Ekki þörf á viðhaldi

Það eru nokkrir íhlutir í bílum sem einu sinni þurftu reglulegt viðhald, en vegna tækniframfara er engin þörf á slíku lengur. Dæmi um slíkt eru kúluliðar og stýrisendar sem áður fyrr þurfti að smyrja reglulega; ný kerti geta enst í allt að 250.000 kílómetra og hér einu sinni þurftu rafgeymar bíla (sem núna eru alveg lokaðir) stöðugs eftirlits við á hæð rafvökva.

[Birtist fyrst í mars 2020]